«Հայրենիք» կուսակցության նախագահ Արթուր Վանեցյանի համոզմամբ՝ ՀՀ Զինված ուժերի Գլխավոր շտաբի հայտարարությունը քաղաքական հայտարարություն չէ: Բաղրամյան պողոտայում լրագրողների զրույցում նա մանրամասնեց. «Եթե ուշադիր ընթերցեք` այդ հայտարարությունում ասվում է՝ նրանք որևէ կերպ իրենց աջակցությունը չեն ցուցաբերում «Հայրենիքի փրկության շարժմանը», որևէ այլ քաղաքական ուժի, ուղղակի խոսել են այն մասին, որ Նիկոլ Փաշինյանն այլևս ի վիճակի չէ ապահովել մեր երկրի անվտանգությունը, և դա պատճառ է, որ նա պետք է հրաժարական տա»:
Ըստ նրա՝ բանակի հայտարարությունը սթափության կոչ է ժողովրդին. «Չկա աշխարհում մի դեպք, երբ պարտված առաջնորդը նման իրավիճակում շարունակում է պաշտոնավարել: Եթե Նիկոլ Փաշինյանը գիտակցեր, երբ նոյեմբերի 9-ին հայտարարությունը իր ֆեյսբուքյան էջում դրեց, պետք է վերջում լինեին այս տողերը՝ ներողություն եմ խնդրում այն ամենի համար, ինչ տեղի ունեցավ, գիտակցում եմ իմ մեղքի բաժինը, հրաժարական եմ ներկայացնում և բոլոր գործընթացները տաներ քաղաքական փուլ: Ամեն դեպքում, այս ամեն ինչի լուծումն ի վերջո լինելու է քաղաքական ճանապարհով»:
Լրագրողների հիշեցմանն ի պատասխան՝ Նիկոլ Փաշինյանն առաջարկում է, որ սկսեն խորհրդակցություններ, Արթուր Վանեցյանը ևս մեկ անգամ վստահեցրեց՝ պատրաստ են հանդիպել Նիկոլ Փաշինյանի հետ միայն նրա հրաժարականը քննարկելու հարցի շուրջ:
Խոսելով ՀՀ ԳՇ-ի հայտարարության մասին՝ նա ևս մեկ անգամ հայտարարեց՝ քաղաքական հայտարարություն չէ. «Քաղաքական հայտարարություն կլիներ, եթե զինված ուժերն իրենց աջակցությունը հայտնեին, օրինակ` «Հայրենիքի փրկության շարժմանը», վարչապետի՝ մեր թեկնածուին: Ռազմական հեղաշրջման փորձ կլիներ, եթե օրինակ, այստեղ ոչ թե քաղաքացիական հագուստով ՀՀ քաղաքացիներ լինեին, հիմա դուք զրկված լինեիք աշխատանքից, ռազմական ղեկավարության իշխանությունն ամբողջությամբ վերցներ իր ձեռքը, զորքերը դուրս գային փողոց, կառավարությունում նստեր ոչ թե Նիկոլ Փաշինյանը, այլ Օնիկ Գասպարյանը»:
Կարդացեք նաև
Հարցին՝ ԳՇ-ն ունի՞ Նիկոլ Փաշինյանին ձերբակալելու իրավասություն, Արթուր Վանեցյանը պատասխանեց. «Գլխավոր շտաբը, եթե փորձ անի ձերբակալել Նիկոլ Փաշինյանին, դա կլինի ռազմական հեղաշրջում, ռազմական հեղաշրջման փորձ, որը չի բխում մեր երկրի շահերից: Երկրում ռազմական հեղաշրջումն անթույլատրելի է: Եկեք ականջալուր լինենք Զինված ուժերի արած հայտարարությանը և հասկանանք, որ իրականում վտանգված է մեր երկրի ապագան: ՀՀ Սահմանադրությամբ Զինված ուժերի գլխավոր շտաբն առանձնացված է: Կա առանձին գլուխ, որտեղ նշված է ԳՇ պետը նշանակվում է հինգ տարի ժամկետով և ևս մեկ անգամ կարող է հինգ տարի ժամկետով երկարաձգվել նրա պաշտոնավարումը, որ նրանք լինեն ապաքաղաքական անկախ քաղաքական ուժերի վերադասավորումներից»:
Արթուր Վանեցյանը հայտարարեց՝ Զինված ուժերն արել է իր քայլը, և կարծում է՝ պիտի նրանց գործողությունները սահմանափակվեն այսքանով:
Տաթև ՀԱՐՈՒԹՅՈՒՆՅԱՆ
