«Հայրը երեխայի համար «բոթաս» է առնում, երեխան ուրախանում է։ Մի օր երեխան հոր կամքը չի կատարում, որովհետեւ հոր՝ պետության ղեկավարի կամքը հակասահմանադրական է։ Եվ հայրն ասում է՝ հիշո՞ւմ ես, որ քո համար «բոթաս» եմ առել։ Հասկանո՞ւմ եք՝ մանկապարտեզ է, ինչ է․․․»,-խորհրդարանում լրագրողների հետ ճեպազրույցում այսօր անդրադառնալով վարչապետ Նիկոլ Փաշինյանի «ֆեյսբուքյան» գրառմանն այն մասին, թե որքանով է բարձրացել զինծառայողների աշխատավարձը եւ ինչ դրական փոփոխություններ են եղել զինված ուժերի համար՝ ասաց «Լուսավոր Հայաստան» խմբակցության ղեկավար Էդմոն Մարուքյանը։
«Նախ, ինչ որ բարձրացրել է, լավ չի բարձրացրել։ Մենք անդադար առաջարկել ենք առաջնագծում ծառայող պայմանագրային զինծառայողների աշխատավարձերը բարձրացնել։ Բացի դա, չի կարելի նման բաները երեսով տալ, այդ ո՞ւմ երեսով է տալիս»,-հարցադրում արեց Մարուքյանը։ «Զոհված սպաների ընտանիքների երեսով է տալի՞ս։ Ո՞ւմ է ուզում դա ասած լինել։ Եթե վախ չունեք, եթե արդար եք, ինչո՞ւ եք վախենում փաստահավաք խումբ ստեղծելուց»,-հարցադրումները շարունակեց նա։
Էդմոն Մարուքյանի խոսքով՝ Փաշինյանն ուզում է բանակը գլխատի, որ բոլոր ապացույցները վերանան։
Կարդացեք նաև
Ինչ վերաբերում է տեղեկություններին, թե Փաշինյանը մտադիր է երկրում պարետային ժամ սահմանել, Մարուքյանն ասաց, որ չունի նման տեղեկատվություն․ «Մի բան ասեմ, թող Փաշինյանը լսի։ ՀՀ-ն բռնապետական երկիր դառնալու ռեսուրս չունի, ոչ էլ իշխանությունն ունի նման կամային հատկանիշներ։ Թող հայտարարի պարետային ժամ․․․երբ 2018թ․-ին մարդիկ փողոցներում էին, Սերժ Սարգսյանն ամեն օր մի քայլով ինքն իր դեմ էր աշխատում։ Հիմա նույնն անում է Փաշինյանը՝ չի ուզում խելացի մարդկանցով համախմբվի»։
Անդրադառնալով Նիկոլ Փաշինյանի հայտարարությանը, թե քաղաքական ուժերին հրավիրում է խորհրդակցությունների, Մարուքյանը հայտնեց, որ իր հետ որեւէ մեկը կապ չի հաստատել։
Լուիզա ՍՈՒՔԻԱՍՅԱՆ
