«Ի՞նչ է նշանակում ռազմական հեղաշրջում։ Մեր ժողովրդին խաբել են, մանիպուլացրել, միջազգային հանրությանն էլ են ստել ու մանիպուլացրել, որպեսզի ստանան աջակցություն։ Ռազմական հեղաշրջումը նշանակում է, որ զինված ուժերը քաղաքացիական իշխանությունը վերցնում են իրենց ձեռքը, քաղաքացիական իշխանության ղեկավարներին էլ՝ կալանավորում ու զորքեր հանում փողոցներ»,-խորհրդարանում լրագրողների հետ ճեպազրույցում այսօր ասաց «Լուսավոր Հայաստան» խմբակցության ղեկավար Էդմոն Մարուքյանը։
Հիշեցնենք, որ ՀՀ ԶՈՒ գլխավոր շտաբը հայտարարությամբ հանդես եկավ եւ պահանջեց Նիկոլ Փաշինյանի հրաժարականը, նա էլ «ֆեյսբուքյան» գրառմամբ նշեց, թե դա համարում է ռազմական հեղաշրջման փորձ: Մարուքյանը շեշտեց․ «ՀՀ-ում անգամ դրա փորձ չի եղել, եւ վարչապետը մանիպուլացնում է ԳՇ հայտարարությունը, որպեսզի օգտագործի ի շահ իրեն եւ համախոհություն գտնի քաղաքացիների շրջանում։ Զինված ուժերը չեն արել ռազմական հեղաշրջման փորձ եւ քրեորեն հետապնդելի որեւէ տարր չկա ԳՇ հայտարարությունում։ Ես դեմ եմ զինված հեղաշրջմանը, բայց դրա փորձն անգամ չի եղել։ Եթե տանկերը հանեին փողոց, ես կլինեի դրա հակառակ կողմում։ ԳՇ հայտարարությունը ծնվել է մի պատճառով, որովհետեւ վարչապետը գլխատում է զինված ուժերը հետեւողական կերպով։ ԵՍ ԶՈՒ-ում կոռումպացված եւ թալանչի գեներալի չեմ ճանաչում, բացի այդ՝ այսքան ժամանակ որեւէ գեներալ չի դատվել։ Վարչապետը դեմ է դուրս եկել իր իսկ կողմից կոչումների արժանացածներին»։
Կարդացեք նաև
Հիշեցնենք՝ Նիկոլ Փաշինյանը երեկ հայտարարեց, թե զինված ուժերում դեռեւս կան նախորդ իշխանության կամակատարներ համարվող բարձրաստիճան սպաներ։
Լուիզա ՍՈՒՔԻԱՍՅԱՆ
