«Միայն պետք է խոսենք թե ինչպես է լինելու իր հրաժարականի օրակարգը, թե ինչ ճանապարհով է նա տալու հրաժարական»,-անդրադառնալով ՀՀ վարչապետ Նիկոլ Փաշինյանի այն հայտարարությանը, թե նույնիսկ ամենասուր քննադատության ենթարկող քաղաքական ուժերի հետ կոնսուլտացիաներ կսկսի, եթե Հանրապետության նախագահը ստորագրի Գլխավոր շտաբի պետի ազատելու հրամանագիրը, կամ Օնիկ Գասպարյանն ինքը հայտարարի իր հրաժարականի մասին, բանակն իր գործերով անցնի, Բաղրամյան պողոտայում լրագրողների հետ զրույցում հայտարարեց «Հայրենիք» կուսակցության ղեկավար, ԱԱԾ նախկին տնօրեն Արթուր Վանեցյանը:
Նրա համոզմամբ՝ արդեն կոչերի ժամանակը չէ, գործողությունների ժամանակն է: Նա վստահեցրեց՝ սա զուտ քաղաքական պայքար չէ, և տանել ամեն ինչ դեպի քաղաքականություն, քաղաքական օրակարգ, համարեց ոչ ճիշտ: Այնուհետև հայտարարեց. «Արդեն պետք է սթափ և ազնիվ խոստովանենք, որ ունենք կորցրած հայրենիք, հազարավոր զոհեր, ամենօրյա ռեժիմով մեր հայրենիքի հատվածներից մեկը մյուսի հետևից կորցնում ենք, տնտեսական լուրջ ճգնաժամ, հասարակության բաժանումներ և այլն»:
Արթուր Վանեցյանը հավաստիացրեց՝ պիտի գործեն Սահմանադրության շրջանակներում ու հորդորեց իրավիճակը սթափ գնահատել ու դրան լուծումներ տալ:
Խոսելով ընդդիմության հետագա գործողությունների մասին՝ ասաց՝ ընդդիմությունը պարզ ու հրապարակային է խոսում ու հավելեց. «Երկրում աբսուրդի հասնող իրավիճակ է, որ արդեն որևէ կառույց, ինստիտուտ չի ընդունում Նիկոլ Փաշինյանի իշխանությունը: Նիկոլ Փաշինյանը, կեղծ շոու բեմադրելով, մարդկանց հանում է փողոց, մանիպուլյացիա օգտագործելով և վարչական ռեսուրս օգտագործելով, սկսում է ցույց տալ, թե իբր ունի ժողովրդի աջակցությունը: Չի կարող ՀՀ քաղաքացին պաշտպանել քաղաքացու, ում պատճառով մենք կորցրել ենք արցախյան հատվածի 71 տոկոսը, ունենք լրջագույն անվտանգային խնդիրներ: Պետք է արագ գործել, լուծել առաջնային հարցը՝ Նիկոլ Փաշինյանի հեռացումը, խոսել ու մտածել ապագայի մասին: Բոլոր կարող ուժերի ներգրավմամբ կառուցենք մեր երկիրը նորովի»:
Կարդացեք նաև
Նա հայտնեց՝ Բաղրամյան պողոտայում իրենց ցույցերը կլինեն անժամկետ, շուրջօրյա ժողովրդին կոչ են անում գալ Բաղրամյան պողոտա: Արթուր Վանեցյանը շեշտեց՝ այսպես թե այնպես իշխանության հարցը լուծվելու է ԱԺ-ում, ուստի ԱԺ պատգամավորներին՝ որպես առաջնային մանդատ կրող կառույցի ներկայացուցիչների, կոչ արեց՝ գալ ու իրենց խոսքն ասել ստեղծված ճգնաժամում:
Տաթև ՀԱՐՈՒԹՅՈՒՆՅԱՆ
