Այսօր ԳՇ-ի հայտարարությունից հետո «Հայրենիքի փրկության շարժումը» հրատապ հավաք հրավիրեց, հետո երթով շարժվեցին դեպի ԱԺ:
Այդ ընթացքում վարչապետն իր աջակիցների հետ երթով շարժվեց դեպի Արշակունյաց պողոտա, «Հայրենիք» կ/թ-ի մոտ:
ՀՅԴ անդամ Գեղամ Մանուկյանը արձագանքեց՝ ճիշտ կանի, որ միանգամից գնա իր հին բնակավայր, որովհետեւ Կոնդի ամառանոցներին սովորել է. «Ասում էր՝ կարոտել եմ հին բնակարանը: Գնա քո բնակարանը եւ սպասի կալանքի օրդերին»:
Կարդացեք նաև
Ազատամարտիկ Արշակ Զաքարյանը ցուցադրեց մի բանալի՝ ասելով, որ Դադիվանքի իր տան բանալին է, պահում է, որովհետեւ հավատացած է, որ մի օր գնալու է իր տուն. «Կոչ եմ անում կանգնել բանակի կողքին, ինչպես միշտ բանակը կանգնել է մեր կողքին: Ես մինչ այս գլուխս կախ էի ման գալիս, սպասում էի նրան, ինչ եղավ այսօր առավոտյան»:
Ինչպես հայտի է, ԱԺ արտահերթ նիստը չի կայացել: ԲՀԿ պատգամավոր Իվետա Տոնոյանը դիմեց իմքայլականներին՝ հորդորելով չվախենալ, նա ասաց, որ իրենց անվտանգությունը երաշխավորում են: Իսկ ԲՀԿ խմբակցության քարտուղար Արման Աբովյանը հորդորեց մարդկանց սադրանքների չգնալ՝ վստահեցնելով, որ իրենք ավելի խելացի են ու ավելի ուժեղ:
ԱԺ-ի մոտ վրաններ են տեղադրվում ու վառարաններ՝ ցուցարարների համար հարմարավետ պայմաններ ապահովելու համար:
Հռիփսիմե ՋԵԲԵՋՅԱՆ
