«Զինված ուժերը, ռազմական ուժերը, իրավապահ համակարգը քաղաքական հայտարարություններ անելու իրավունք չունեն, դա անընդունելի է»,- Aravot.am-ի հետ զրույցում ասաց Ազգային ժողովի «Իմ քայլը» խմբակցության պատգամավոր Լուսինե Բադալյանը։
Հիշեցնենք Գլխավոր շտաբը այսօր հայտարարություն է տարածել, որով պահանջում է ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց։
«Յուրաքանչյուրն իր մասով պետք է կատարի իր ծառայությունը և երկիրը զերծ պահի ցանկացած տեսակի ցնցումներից։ Հետևաբար՝ այս ամենից ելնելով, բնականաբար, քաղաքական հայտարարությունը այդպիսի կառույցների կողմից համարում եմ անընդունելի»,- ասաց նա։
Կարդացեք նաև
Լուսինե Բադալյանը կարծում է, որ նման հայտարարություններն ավելի շատ միտված են ռազմական հեղաշրջմանը․ «Այս պայմաններում հայտնված երկրի համար կարող է շատ-շատ վտանգավոր լինել։ Բոլորս էլ անընդհատ պնդում ենք, որ երկրում կայունությունն է ամենակարևորը այս պահին, բայց ռազմական հեղաշրջման փորձը այդ կայունությունը կարող է մի վայրկյանում ի չիք դարձնել։ Եվ հետևաբար՝ կարծում եմ, պետք չէր նման կերպ արձագանքել»։
Նրա խոսքով՝ իրավիճակը կառավարելի է, սակայն ամեն դեպքում որոշումը կայացնելու է ժողովուրդը․ «Սկզբունքային հարց է, որ իշխանությունը պատկանում է ժողովրդին, և ժողովուրդը պետք է որոշի։ Այսօրվա այս հավաքը ևս այդ շրջանակներում է, և ժողովուրդը պետք է հավաքվի և որոշի, քանի որ շատ արագ՝ մեկ օրում, ընտրություններ անել չես կարող, քանի որ շատ արագ այլ տարբերակով կամ հանրաքվեի տարբերակով չես կարող որոշել, թե ժողովուրդը ինչ է ուզում։ Մնում է միակ այս իրավիճակը, որտեղ որ ժողովուրդը կհավաքվի և ժողովուրդը կորոշի՝ արդյոք ի՞նչ է արվում վաղվանից սկսած։ Այսինքն՝ մենք հանձնո՞ւմ ենք իշխանությունը և անկարող ենք կառավարել այս պայմաններում երկիրը, ուրեմն՝ եթե ժողովուրդը որոշում է՝ մենք գնում ենք տուն, եթե ժողովուրդը ունենում է այլ ցանկություններ, արվում է այն, ինչ կորոշի ժողովրդի մեծամասնությունը»։
Լուսինե Բադալյանը բացառում է Մարտի 1-ի իրադարձությունների կրկնությունը, որևէ բռնություն իշխանության կողմից․ «Բնականաբար, մյուս կողմերից հնարավոր է՝ լինեն սադրանքներ, բայց միևնույն է՝ մենք հնարավորինս մեղմ մոտեցումներով պետք է փորձենք սա կառավարել։ Որովհետև եթե մեզ համար ցանկացած քաղաքացու կարծիքը կարևոր չլիներ, այդ դեպքում հնարավոր է, այսինքն՝ միայն մեր աջակիցների կարծիքը կարևոր լիներ։ Բայց քանի որ մեզ համար կարևոր է բոլորի որոշումը և բոլորի կարծիքը, հետևաբար՝ չեմ կարծում, որ մեր քաղաքական ուժը երբևիցե իրեն թույլ կտա ժողովրդի նկատմամբ որևիցե բռնություն»։
Ամի ՉԻՉԱԿՅԱՆ
