«Այս պատերազմի ընթացքում բանակը որոշ ժամանակահատվածում մենակ էր մնացել: Այս ամենը արդյունք է ոչ լիարժեք, անգրագետ, ապիկար կառավարման»,- այսօր Ազատության հրապարակում հավաքի ժամանակ հայտարարեց պաշտպանության նախկին նախարար Սեյրան Օհանյանը:
Ինչպես տեղեկացրել ենք, այսօր գլխավոր շտաբի հայտարարությունից հետո Ազատության հրապարակում «Հայրենիքի փրկության շարժումը» հրատապ հավաք հրավիրեց:
Սեյրան Օհանյանն ասաց. «Կառավարության ղեկին նստած անձնավորությունը կառավարման որեւէ հատկանիշ չունի: Դրա արդյունքում է, որ բանակը պատերազմի ժամանակ մնաց միայնակ: Մեր ողջ պատմության ընթացքում մեր կողքին կարմիր թելով անցել է մի շատ կարեւոր առանձնահատկություն՝ վտանգի պահին մենք միասնական ենք, հավաքական կամքի շնորհիվ ենք հաղթանակի հասել: Այս պատերազմի ժամանակ այս ապիկար իշխանությունները այդ առանձնահատկությունը հիմնովին ոչնչացրեցին: Նախորդ պատերազմի ժամանակ շարժման ղեկավարների մեկ ձայնով ամբողջ ժողովուրդը հավաքվեց»:
Սեյրան Օհանյանը նաեւ անդրադարձավ Հանրապետության հրապարակում վարչապետի աջակիցների հավաքին. «Չեմ մեղադրում որեւէ մեկին բազմակարծության համար, բայց ինչո՞ւ այդ նույնը չարեց պատերազմի ժամանակ այսպես կոչված գերագույն գլխավոր հրամանատարը: Որովհետեւ նրան պետք չէր բանակը, իրեն պետք էր դա միայն ինքնագովազդով զբաղվելու համար: Ինքնագովազդով կարո՞ղ են պետություն կառավարել, իհարկե, ոչ»:
Կարդացեք նաև
Օհանյանը նաեւ հիշեցրեց դեպի Եռաբլուր երթը. «Նա թեւ ու թիկունք չկանգնեց իր բանակին: Հիմնահատակ ջախջախել է մեր ժողովրդի միասնության գաղափարը այս պատերազմի ժամանակ: Ես չեմ զարմացել, որովհետեւ այդ ամենը իրականացրել է 2,5 տարվա ընթացքում՝ պառակտելով մեր հասարակությունը, բաժանելով սեւերի եւ սպիտակների, հների ու նորերի: Չհասկանալով, որ հին զինվորական ծառայության մեջ կային փորձառու անձնավորություններ: ՀՀ ԳՇ պետի առաջին տեղակալին հենց այնպես՝ կարծիք արտահայտելու համար ազատում են պաշտոնից: Սկզբում ազգային հերոսի կոչում են տալիս, հետո՝ ազատում: Չհասկանալով, որ երբ արցախյան առաջին ազատամարտը սկսվեց, նույն ԳՇ պետի տեղակալը 19 տարեկանում թողելով իր ուսումը բարձրագույն ուսումնական հաստատությունում, զենք վերցրեց ու գնաց պատերազմի: Ո՞ւր էր այդ ժամանակ նույն Նիկոլը՝ թաքնվելով եղբայրների հետեւում, ասելով, որ ես սովորում եմ: Եթե հայրենասեր էիր, վերցնեիր զենքը ու գնայիր, բազմաթիվ ուսանողներ ջոկատներ կազմելով գնացին պատերազմի: Հիմա սուտ հայրենասիրություն ես խաղում»:
Սեյրան Օհանյանը խոնարհվեց գեներալների, սպաների առջեւ:
Հռիփսիմե ՋԵԲԵՋՅԱՆ
