Այսօր Ազատության հրապարակում «Հայրենիքի փրկության շարժումը» հրատապ հավաք հրավիրեց: Հրապարակը բազմամարդ է ու պատրաստ են անգամ գիշերել այնտեղ, մինչեւ վարչապետ Նիկոլ Փաշինյանը հրաժարական կտա:
Շարժման անդամները վստահեցնում են, որ բանակի հետ են ու այսօր Հայաստանի գլխավոր «չարիքից» պետք է ազատվեն. «Պարոնայք սպաներ, մենք կանգնած ենք ձեր թիկունքին, որովհետեւ մեր երկրի անվտանգությունն ու ինքնիշխանությունը միայն դուք եք, որ կարող եք պաշտպանել եւ ոչ թե կապիտուլյանտը»,- հայտարարեց ՀՅԴ անդամ Գեղամ Մանուկյանը: Նա հորդորեց ցուցարարներին հեռախոսը վերցնել, զանգել հարազատներին, ընկերներին, կանչել Ազատության հրապարակ, քանի որ այսօր վճռական օր է, մեր երկիրը պետք է ուղղի ողնաշարը, ազատ շնչի ու վերականգնի իր արժանապատվությունը:
Ելույթ ունեցավ շարժման վարչապետի թեկնածու Վազգեն Մանուկյանը՝ ասելով, որ Փաշինյանի ձեռագիրն է մարդկանց սեւերի ու սպիտակների բաժանել ու բախումներ հրահրել: Նա կոչ արեց քաղաքացիներին զսպվածություն ու վճռականություն ունենալ. «Գործն արդեն վերջանում է: Վերջանում է առաջին փուլը, որ մենք Նիկոլ Փաշինյանին դեն կշպրտենք ու գալիս է երկրորդ փուլը՝ վերականգնելու մեր հայրենիքը, դարձնելու ազատ, արդար, հզոր Հայաստան»:
Կարդացեք նաև
Նա ողջունեց բանակի քայլը՝ ասելով, որ այսօր բանակի ու ժողովրդի միասնության օրն է. «Սա հեղաշրջում չի: Բանակն ունի սահմանադրական իրավունք նշելու Հայաստանի թիվ մեկ թշնամուն ու բանակը նշեց, ասեց՝ դա Նիկոլ Փաշինյանն է: Այսինքն, մեր անվտանգության ամենամեծ թշնամին նա է, որ պետք է հեռացվի ու գնա»:
Վազգեն Մանուկյանը կոչ արեց ոստիկանությանն ու ԱԱԾ-ին, որ միանան բանակին ու միանման հայտարարություն անեն:
Նա կոչ արեց նաեւ «Իմ քայլի» պատգամավորներին, որոնց մի մասն ընկել է ծուղակի մեջ, դուրս գալ այդ խմբակցությունից ու այդ սեւ բիծը չվերցնել իրենց վրա:
Ի դեպ, ընդդիմության պատգամավորները դիմել են ԱԺ նախագահ Արարատ Միրզոյանին՝ այսօր ժամը 18-ին արտահերթ նիստ հրավիրելու պահանջով:
Հռիփսիմե ՋԵԲԵՋՅԱՆ
