Երբ այսօր ՀՀ ԶՈՒ գլխավոր շտաբի մի շարք գեներալներ հայտարարությամբ հանդես եկան Նիկոլ Փաշինյանի եւ կառավարության հրաժարականի պահանջով, Փաշինյանը ՖԲ ուղիղ եթերում իր համախոհներին կոչ արեց անմիջապես հավաքվել «Հանրապետության» հրապարակում, որտեղից էլ երթ կազմակերպվեց մայրաքաղաքի կենտրոնական փողոցներով:
Երթին մասնակցում էր նաեւ ՀՀ ԱԺ փոխխոսնակ Ալեն Սիմոնյանը: Aravot.am-ը կարճ զրույց ունեցավ նրա հետ:
-Պարոն Սիմոնյան, ի՞նչ ցույց տվեց այս երթը:
-Այս երթը ցույց է տալիս, որ Հայաստանի Հանրապետությունը ունի ընտրված իշխանություն եւ իշխանությունը ունի Հայաստանի Հանրապետության ժողովրդի մեծ մասի աջակցությունը:
Կարդացեք նաև
-Իսկ իշխանությունը Հայաստանի ժողովրդի վրա կրակելու լեգիտիմ իրավունք ունի՞:
-Այդ բառակապակցությունն իր մեջ պատասխան է պարունակում:
-Եվ ո՞րն է այդ պատասխանը:
-Որ եթե ձեզ ինչ-որ մեկը ուզենա սպանել, անձամբ ձեզ կամ մեր ընթերցողին, իշխանությունը պարտավոր է պաշտպանել այդ մարդուն բոլոր հնարավոր միջոցներով: Դա իշխանության ոչ թե իրավունքն է, այլ պարտականությունն է:
-Այդ թվում նաեւ կրակելո՞վ:
-Այդ թվում նաեւ կրակելով:
-Բայց 2018 թվականին իշխանությունը չկրակեց:
-2008-ին կրակեցին:
-Մենք հիմա խոսում ենք 2018 թվականի մասին:
-2018 թվականին ո՞նց պիտի կրակեին: Ժողովուրդը ժողովրդի վրա կրակե՞ր: Ես ուզում եմ հասկանալ զուգահեռները, որ դուք տանում եք: Հայաստանի Հանրապետության ժողովուրդը պաշտպանության իրավունք ունի եւ իշխանությունը պարտավոր է Հայաստանի Հանրապետության ժողովրդին պաշտպանել: Եթե ինչ-որ մեկի մտքով կանցնի, որ ինքը կարող է ՀՀ քաղաքացիների անվտանգությանը սպառնալ, այո, Հայաստանի Հանրապետության իշխանությունը, բանակը, ոստիկանությունը պետք է միջոցներ ձեռնարկեն:
Աշոտ ՀԱԿՈԲՅԱՆ
