Քաղաքացիների հավաքը կառավարության շենքի դիմաց սկսվեց միջադեպով։ Մի տղամարդ մոտեցավ կառավարության մուտքը հսկող ոստիկաններին, բղավեց, նախատեց, որ պաշտպանում են Նիկոլ Փաշինյանի անվտանգությունը։ Դա դուր չեկավ մեկ այլ քաղաքացու, որը բղավեց տղամարդու վրա։ Բախումից խուսափելու համար ոստիկաններից մեկը հրելով հեռացրեց նրան։
Հիշեցնենք, որ այսօր ՀՀ ԶՈՒ գլխավոր շտաբը հայտարարությամբ հանդես եկավ եւ պահանջեց Նիկոլ Փաշինյանի հրաժարականը, նա էլ «ֆեյսբուքյան» գրառմամբ նշեց, թե դա համարում է ռազմական հեղաշրջման փորձ եւ իր կողմնակիցներին հրավիրում է Հանրապետության հրապարակ։
Մի երիտասարդ գործադիրի մուտքի մոտ հայտարարեց․ «Ոչ մի անօրինական քայլ։ Սադրիչներ են լինելու։ Թույլ չենք տալու անօրինական ճանապարհով՝ սրի, թրի ուժով մեր ձեռքից գողանան մեր ընտրությունը։ Ես որպես քաղաքացի հայտարարում եմ՝ կյանքիս գնով, սրբորեն պաշտպանելու եմ ընտրությունս, որովհետեւ 27 տարի տեսել ենք իրենց, իրենց քաղաքականությունը»։
Փաշինյանի կողմնակիցը նշեց, որ թալանչիներին թույլ չեն տա գողանալ իրենց ընտրությունը․ «Վարչապետն ընտրվել է օրինական ընտրություններով»։
Կարդացեք նաև
Փաշինյանի մեկ այլ կողմնակից էլ բարձրախոսով հայտարարեց, որ ըստ սահմանադրության՝ ՀՀ զինված ուժերը պարտավոր են պահպանել քաղաքական չեզոքություն, իսկ քաղաքացիները ռազմական հեղաշրջման փորձ թույլ չեն տա։
Լուիզա ՍՈՒՔԻԱՍՅԱՆ
