Արմեն Խաչատրյանը հաստատում է Անդրանիկ Քոչարյանի խոսքը ու վստահեցնում՝ կարող են եւ նույնիսկ պարտավոր են հրազեն կիրառել:
ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանի հայտարարությունը, որ եթե ընդդիմությունը պետական շենք-շինություններ գրավելու մասին է խոսում, ապա պետք է հասկանան, որ այդ շենքը պետական պաշտպանության տակ է եւ պետությունը կարող է կրակել՝ քննարկումների եւ բազմաթիվ հարցերի տեղիք է տվել, թե ինչպե՞ս կարող է այս իշխանությունը սպառնալ՝ ժողովրդի վրա կրակելով:
Այս առնչությամբ «Առավոտի» հետ զրույցում «Իմ քայլը» խմբակցության պատգամավոր, նույն հանձնաժողովի անդամ Արմեն Խաչատրյանն ասաց. «Անդրանիկ Քոչարյանը ճիշտ է արել, որ ասել է: Ես դա գնահատում եմ՝ որպես պրոֆիլակտիկ միջոց: Եթե զգում ես, որ մարդը շեղվում է ուղուց եւ ի վիճակի է հանցագործություն կատարել, պետք է այդ մարդու նկատմամբ կիրառել համոզման մեթոդ, զգուշացնել, պրոֆիլակտիկ միջոցներ ձեռնարկել, որպեսզի դա տեղի չունենա: Անդրանիկ Քոչարյանը նշել է, որ ոչ թե իշխանությունը կրակելու է ընդդիմության վրա, այլ պետությունը կարող է կրակել այն բոլոր մարդկանց վրա, այն բոլոր հանցագործների վրա, որոնք կփորձեն հարձակվել կարեւորագույն օբյեկտների վրա»:
Արմեն Խաչատրյանը նշեց, որ զենքի կիրառման եւ օգտագործման կանոնների մեջ օրենքով սահմանված է, որ կարեւորագույն օբյեկտների վրա հարձակման դեպքում պահպանություն իրականացնող ծառայությունը կարող է եւ «պարտավոր է» կիրառել զենք: Կարեւորագույն օբյեկտների ցանկը սահմանված է ՀՀ կառավարության որոշմամբ: Դրա մեջ մտնում է, օրինակ, ատոմակայանը, կառավարության շենքը, ԱԺ-ի շենքը եւ այլն. «Այո, պետությունը պարտավոր է կիրառել զենք, եւ մենք պարտավոր ենք մեկ անգամ եւս հիշեցնել արկածախնդիրներին, որոնք ընդամենը կարող են խոսել, ես վստահեցնում եմ ձեզ, որեւէ բան չեն կարող անել, քանի որ այս երկրում կա պետություն եւ իրավակարգ, հիշեցնենք, որ նման հայտարարություն անելն արդեն իսկ համարվում է հանցագործություն, բայց փորձենք նախականխել պրոֆիլակտիկ միջոցներով: Եթե դա չի բավարարի, ապա հաստատ պետությունը այլ միջոցներ կձեռնարկի՝ խափանելու եւ այդ անձանց պատասխանատվության ենթարկելու համար: Ով ուզում է լինի, երբ ուզում է լինի ու որ իշխանությունն էլ լինի՝ եթե ինչ-որ մեկը երկրում փորձում է հարձակվել կարեւարգույն օբյեկտների վրա, պետք է շատ լուրջ հակահարված ստանա: Դա պետության առաջին պարտականությունն է»:
Կարդացեք նաև
Հարցին՝ այսինքն, հեղափոխության ժամանակ, որ ռադիոտան շենքի դռները ջարդում էին, իսկ դա ռազմավարական նշանակության շենք է, պետք է կրակեի՞ն ձեր վրա՝ Արմեն Խաչատրյանը պատասխանեց. «Դա չի դիտվում որպես հարձակում, այն ժամանակ դա հարձակում չի եղել: Հեղափոխության ընթացքում շատ մեծ պրոցեսներ են տեղի ունեցել, բազմաքանակ միտինգներ են եղել՝ տասնյակ, քսան անգամ ավելի, լուրջ գործընթացներ են եղել, բայց եկեք ֆիքսենք, որ որեւէ բռնություն հեղափոխության ընթացքում չի եղել, ինչը երեւի պատմության ընթացքում եզակի դեպք է: Որեւէ բռնություն չի կիրառվել ընդհանրապես: Իսկ եթե այսօր մարդիկ բռնության կոչեր են անում՝ գրավենք, կայծակնային չգիտեմ ինչեր անենք, սա արդեն բռնություն կիրառելու կոչեր են: Սա տրամագծորեն տարբերվում է այն ամենից, ինչը եղել է եւ ինչի անունը դրել էին թավշյա: Սա թավշյա վիճակ չի եւ պետությունը պետք է միջոցներ ձեռնարկի: Կրկնում եմ՝ բոլոր իշխանությունների օրոք, ով կլինի իշխանության, ով չի լինի՝ կարեւորագույն օբյեկտների վրա եթե մեկը փորձի հարձակվել, եթե այլ միջոցներով հնարավոր չի կանխել հանցագործությունը, պետք է կիրառվի հրազեն: Սա ուղղակի մեջբերում է օրենքից, որը գործում է տասնյակ տարիներ, հիշեցնում է որոշ մարդկանց, որպեսզի հանցագործություններ չանեն եւ չդատապարտվեն: Մենք չենք ուզում, որ որեւէ անձ այս երկրում դատապարտվի: Դատապարտվածների քանակի ավելացումը լավ նշան չի պետության համար»:
Հարցին՝ ընդդիմությունը սպառնում է, որ օր ու արեւ չի տալու ձեզ՝ իշխանական պատգամավորներիդ, բոլոր այն դավաճաններին, որոնք Նիկոլ Փաշինյանի թիմի մաս են կազմում, ստացվո՞ւմ է իրենց մոտ՝ Արմեն Խաչատրյանը պատասխանեց. «Հարցը նրանում է, թե ով է դավաճան: Ես դավաճաններին ավելի շատ կվերագրեի իրենց շատ ու շատ թիմակիցներին ու դա՝ փաստերով: Որեւէ մեկը այս աշխարհում չի կարող ինձ անվանել դավաճան, որեւէ մեկը չի կարող ինձ օր ու արեւ չտալ, իմ տեղը հայտնի է: Ես ամեն օր գալիս եմ աշխատանքի, դրսում, փողոցում եմ լինում, հանրության հետ եմ շփվում, լինում եմ մարզերում: Ուզում եմ հասկանամ՝ ինչպե՞ս պետք է ինձ օր ու արեւ չտան: Եվ եթե հայտարարել են ու տղամարդ են, թող այդ օր ու արեւը չտան ինձ, փորձեն՝ կտեսնեք»:
Խոսելով փետրվարի 20-ի ընդդիմության հանրահավաքի մասին, Արմեն Խաչատրյանն ասաց, որ գնահատում է այն մարդկանց, որոնք զուտ գաղափարական հակասություն ունեն այս իշխանության հետ ու գնացել են ցույցի, բայց, ըստ նրա, հանրահավաքի մասնակիցների մեծ մասին բերել են այնտեղ ստիպելով. «Երբ որ հավաքներ կամ նման միջոցառումներ իրականացնելու համար մարդկանց իրենց գործատուները, սեփականատերերը ստիպում են, կախման մեջ լինելը օգտագործում են ու բերում են հրապարակ՝ սա արդեն սուլթանիզմի դարաշրջանի վերադարձ է եւ սա հաստատ պետությունը չի հանդուրժելու՝ ցանկացած իշխանության ժամանակ: Եթե մարդը կախված եղավ իր գործատուից, պաշտոնյայից եւ նրան կստիպեն՝ գնա ընտրության, գնա հանրահավաքի, գնա քաղաքական պրոցեսներին մասնակցի ստիպողաբար՝ սա պետք է լուրջ արձագանք ստանա պետության կողմից: Այդ մարդիկ պետք է հասկանան, որ ինչ տեղի է ունեցել այս երկրում, հենց առաջինը իրե՛նց բացառելու համար է տեղի ունեցել: Բազմաթիվ ահազանգեր կան, որ մարդիկ գալիս են հանրահավաքի իրենց գործատուների պահանջով, զգալի մասի ներկայությունը հենց պայմանավորված է դրանով: Կան մարդիկ, որոնք գաղափարակից չեն այս իշխանություններին ու եկել են իրենց կարծիքը արտահայտելու, դա նորմալ է, հարգանքի արժանի է, բայց այդ բազմահազար ցույցի զգալի մասն այդտեղ է եկել գործատուների, հիմնարկների կողմից: Եթե վերլուծեք, կտեսնեք, որ հիմնարկներ կան՝ բոլոր ցույցերին պարտադիր նույն քանակությամբ մարդիկ են բերում: Զանգում են, տեղեկացնում են դրա մասին, որ ուղղակի խնդիրը դրանում է: Երբ լրագրողը ցանկանում է հարցազրույց վերցնել հրապարակում գտնվողներից, 10-ից մեկն է համաձայնվում, մարդիկ նույնիսկ ամաչում են, որ գտնվում են այնտեղ»:
Հռիփսիմե ՋԵԲԵՋՅԱՆ
«Առավոտ» օրաթերթ
24.02.2021
