ՀՀ ոստիկանապետ Վահե Ղազարյանը հրաժարվեց հանդիպել ՀՀ վարչապետ Նիկոլ Փաշինյանի հրաժարականը պահանջող քաղաքացիներին:
Հիշեցնենք՝ ցուցարարները պահանջում էին ոստիկանապետին, որպեսզի իջնի և պատասխան տա այն ապօրինությունների համար, որոնք ոստիկաններն իրականացրին փետրվարի 23-ի կեսօրին:
ՀՅԴ Հայաստանի ԳՄ ներկայացուցիչ Իշխան Սաղաթելյանը տեղեկացրեց՝ իրենց ոստիկանապետի անունից փոխանցել են, որ նա ցուցարարներին կհանդիպի, բայց ոչ այսօր: Ցուցարար-քաղաքացիները գոչեցին՝ ամոթ, ամոթ:
Իշխան Սաղաթելյանը հայտարարեց. «Հստակ է, որ ոստիկանապետը չի կարող պարզաբանում և բացատրություն տալ այսօրվա՝ իր կողմից կատարած և ձեռնարկված ապօրինությունների մասին: Մենք գտնում էինք, որ սա լավ առիթ էր, որ ոստիկանությունն իջներ ներքև, խոստանար, որ այլևս ապօրինություններ չի կատարելու»:
Կարդացեք նաև
Իշխան Սաղաթելյանը նշեց՝ ունեն երկու ճանապարհ ու ասաց. «Կարող ենք ժողովրդի ողջ զայրույթն ուղղել ձեզ, ձեր պետին ու բոլորին: Բայց մենք այդ ճանապարհով չենք գնում, մենք ձեզ դեռ շանս ու հնարավորություն ենք տալիս: Գործողությունների կանցնենք, երբ անհրաժեշտ լինի: Իմացեք, դուք եթե ձեր անցած կարմիր գիծը շարունակեք մյուս անգամ, ձեզ այցելության գալու ենք այլ կերպ: Պիտի հասկանաք երկրի իրավիճակը, ձեր պարտականությունները ու չկատարեք այդ խելագարի հրահանգները: Դուք անցել եք կարմիր գիծը. սա հաջորդ անգամ կրկնվելու դեպքում ստանալու եք պատասխան: Ոնց ուզում եք, նենց էլ հասկացեք»:
Այնուհետև երթի մասնակիցները շարժվեցին դեպի ԱԱԾ շենք: Նրանց միացան Երևանի տարբեր փողոցներում անհնազանդության գործողություններ իրականացնող քաղաքացիները:
Հազարավոր քաղաքացիներ «Նիկո′լ դավաճան», «Առանց Նիկոլ Հայաստան» վանկարկումներով կաթվածահար են արել Երևանի տարբեր փողոցներ: Իշխան Սաղաթելյանը, դիմելով ՀՀ ոստիկանապետին, հայտարարեց. «Ոստիկանապե′տ, մեղքը քո վիզը»:
Տաթև ՀԱՐՈՒԹՅՈՒՆՅԱՆ
