«Ընդդեմ իրավական կամայականությունների» ՀԿ նախագահ, ՀՀ մարդու իրավունքների առաջին պաշտպան Լարիսա Ալավերդյանն այսօր անդրադարձավ Արցախի վերահսկողությունից դուրս գտնվող տարածքներում հայ զինվորների որոնողական աշխատանքները անժամկետ դադարեցնելու մասին որոշմանը:
Տիկին Ալավերդյանը հիշեցրեց, որ Ադրբեջանը սկսած դեռ 90-ականներից՝ Հեյդար Ալիեւի ղեկավարման տարիներից, արհամարհում, ոտնահարում էր միջազգային մարդասիրական իրավունքի նորմերը, իսկ հիմա ուղղակիորեն հակադրվում է այդ միջազգային հումանիտար իրավունքի նորմերին:
«Արդյո՞ք չկա պատժելիության սկզբունքի իրացում միջազգային մարդասիրական սկզբունքների մեջ: Անշուշտ կա, եւ դրան նվիրված են բավականին հստակ ձեւավորված փաստաթղթեր, հատուկ ուսումնասիրությունների արդյունքում ստեղծված նյութեր: Օրինակ, միջազգային մարդասիրական իրավունքի սովորութային նորմերը, որտեղ հստակ գրված է. հենց ավարտվում են մարտական գործողությունները, ուշադրություն դարձրեք, ոչ թե պատերազմը, այլ կոնկրետ մարտական գործողությունը, պետությունները ամեն անգամ պարտավոր են անմիջապես սկսել զբաղվել վիրավորներով, զոհվածներով: Փաստորեն ամեն մի պետության պարտադրվում է մատուցել համապատասխան ծառայություններ, մինչեւ անգամ՝ արժանապատվորեն հուղարկել:
Երկրորդ, նորմը ուղղակի է ասում, որ պարտավոր են բոլոր ռազմագերիներին վերադարձնել առանց որեւէ պայմանի: Եվ հաջորդը, որ պատանդ վերցնելը արգելված է եւ միշտ պետք է արգելվի: Այսինքն, ձեւակերպումները շատ հստակ են»,-ասաց ՀՀ առաջին ՄԻՊ-ը:
Կարդացեք նաև
Նաեւ նշեց, որ Ադրբեջանի կեցվածքը «միջազգային նորմերով հանցագործությունների մի փունջ է՝ հանցագործություն է խաղաղության դեմ, ռազմական հանցագործություններ է, մարդասիրության դեմ հանցագործություն եւ ցեղասպանական հանցագործություն է: Ադրբեջանը սրանք անում է, բայց միաժամանակ նա այնքան ակտիվ է աշխատում բոլոր դաշտերում, որտեղ մենք ուղղակի գոյություն չունենք, թեկուզ անդամակցում ենք բազմապիսի միջպետական կազմակերպություններին: Եվ, անշուշտ, իր այս լկտի պահվածքը բացատրվում է նաեւ Հայաստանի, որպես պետության, վերին աստիճանի դատապարտելի, եթե չասեմ՝ անգործությունով, ապա՝ պասիվությամբ»,-նշեց տիկին Ալավերդյանը:
Աշոտ ՀԱԿՈԲՅԱՆ
