Նիկոլ Փաշինյանին հեռացնելու պահանջով ընդդիմության հանրահավաքին մասնակցում էր «Բարգավաճ Հայաստան» կուսակցության նախագահ Գագիկ Ծառուկյանը:
Ելույթի ժամանակ նա ասաց, որ եկել է ճշմարտությունն ասելու եւ երբեք չի խաբել ժողովրդին: Անդրադարձավ տնտեսական ճգնաժամին, համավարակին, պատերազմին, անհետ կորածների, գերիների ծնողներին, որոնք տեղյակ չեն իրենց զավակներից:
«Գժվելու բան է, գերիների, անհետ կորածների ծնողները գիշերները չեն քնում, գոնե նրանց ընդունեն, պատասխանեն, մարդիկ անուշադրության են մատնված: Դուք կհիշեք, որ ես 2020 թ. հունիսի 5-ին ասացի, որ անդունդի եզրին ենք, կառավարությունը պետք է հրաժարական տա, այս անփորձ երիտասարդներն ի վիճակի չեն կառավարելու, արդեն երկուսուկես տարի ոչինչ չեն արել, ասացի՝ եթե հրաժարական չտան, Արցախը կորցնելու ենք: Ասացի՝ ունենք 3-4 ամիս ժամանակ, դա եղել է հունիսի 5-ին, եւ արդեն սեպտեմբերին պատերազմը սկսվել է: Եթե խելք ունենային, լսեին, նախապատրաստվեին, քայլ կատարեին, պատերազմը չէր լինի, այդքան զոհեր չէին լինի: Ժողովուրդն այսօր հավաքվել է այս ձյան տակ, այս ցրտին, որովհետեւ արդեն դանակը հասել է ոսկորին: Հավաքվածներից կա՞ մարդ, որ վարկ չունի»,-հարցրեց նա:
Հանրահավաքի մասնակիցները պատասխանեցին` ոչ: «Եթե գործ չկա, փող չկա, ճգնաժամ է, մարդը չի կարողանում իր երեխային կերակրի, գազի, հոսանքի փողը վճարի, մարդը ո?նց ապրի»,-հռետորական հարց հնչեցրեց նա:
Կարդացեք նաև
Գագիկ Ծառուկյանն ասաց, որ մինչեւ Ազատության հրապարակ գալն իրեն բազմաթիվ մարդիկ են մոտեցել տարբեր ոլորտներից՝ հարցրել են` ոնց ապրեն. «Մարդիկ մոտենում են, լացում են, ասում են չորս երեխա ունեմ, չեմ կարողանում ապրել: Պետությունը պետք է որոշ վարկեր սառեցնի, մինչեւ վիճակը կարգավորվի»:
Նա շեշտեց, որ օրեցօր ավելի է վատանալու երկրի վիճակը, եւ ազգի փրկության միակ ճանապարհը իշխանության հրաժարականն է:
Գոհար ՀԱԿՈԲՅԱՆ
