«Երբ դիտարկենք մաքսային մուտքերն առանց ավտոմեքենաների մաքսազերծման, ապա տեսնում ենք, որ 2020 թվականին մաքսային մուտքերը 2019 թվականի համեմատ նվազել են, սակայն գրեթե նման են 2018 թվականի ցուցանիշներին»,-այս մասին այսօր ասաց ՊԵԿ մաքսային վիճակագրության եւ եկամուտների հաշվառման վարչության պետ Մնացական Շարաֆյանը:
Նա «Արմենպրես»-ի մամուլի սրահում հրավիրված ասուլիսում ասաց, որ 2020 թվականին համավարակը, պատերազմը բացասական ազդեցություն են ունեցել մաքսային մարմինների կողմից պետական բյուջեի մուտքերի, ինչպես նաեւ ներմուծումների եւ արտահանումների միտումների վրա:
Անդրադառնալով ներմուծման եւ արտահանման տվյալներին՝ Մնացական Շարաֆյանը նշեց, որ 2020 թվականին, 2019 թվականի համեմատ, գրանցվել է մոտ 7 տոկոս արտահանման նվազում, 17.5 տոկոս էլ՝ ներմուծման նվազում: Բայց ըստ ՊԵԿ-ի պաշտոնյայի, կան ուղղություններ, որտեղ դրական միտում է գրանցվել: Խոսքը, մասնավորապես, 2020-ին ԵԱՏՄ անդամ պետություններից ներմուծումների մասին է, որն աճել է 1.3 տոկոսով: 2018 թվականի համեմատ ԵԱՏՄ երկրներից ներմուծումներն աճել են մոտ 20 տոկոսով, ինչն, ըստ Մնացական Շարաֆյանի, բավական տպավորիչ է:
Դրական ցուցանիշներ կան նաեւ արտաքին տնտեսական գործունեությամբ զբաղվողների կառուցվածքում. «Մենք 2020 թվականին ունենք արտահանողների 3 տոկոսով աճ: Շատերը շարունակել են ակտիվորեն ներդրում ունենալ տնտեսության մեջ: Այստեղ պետք է նաեւ հաշվի առնենք այն, որ 2019 թվականին ունեինք աննախադեպ աճ՝ մոտ 55 տոկոսով ե՛ւ ներմուծողների, ե՛ւ արտահանողների քանակով։ Վերջինս ենթադրում է, որ 2018 թվականը որպես բազիսային տարի ընդունելու պարագայում նշված ցուցանիշները շարունակել են պահպանվել բարձր մակարդակի վրա»,-ասաց պարոն Շարաֆյանը:
Կարդացեք նաև
Լուսինե ԲՈՒԴԱՂՅԱՆ
