«Էդմոն Մարուքյանը խորհրդարանում կապիտուլյանտի հենարանն է»,- այսօր «Հայելի» մամուլի ակումբում ասաց ՀՀԿ ԳՄ անդամ Կարինե Աճեմյանը՝ անդրադառնալով Սերժ Սարգսյանի հարցազրույցի առիթով «Լուսավոր Հայաստան» խմբակցության ղեկավար Էդմոն Մարուքյանի հնչեցրած գնահատականներին:
«2018-ին ես տեսա մարդկանց, ովքեր դագաղի շուրջ պարում էին, երգ ու երաժշտություն էին դնում, սա մեղք էր և սրա պատասխանը եղավ:
Սերժ Սարգսյանի կողքին չկար Սերժ Սարգսյան, որին կփոխանցեր իշխանությունը: Իսկ աթոռը երբեք նրա համար գերխնդիր չի եղել: Ես նաև մեզ մեղադրում եմ, թե ինչու չընդվզեցինք 2018-ին, բայց այդ թունավոր մթնոլորտի պայմաններում անհնար էր:
Օրեր առաջ տեսա, որ Թատերական համալսարանի ուսանողները պայքարում են իրենց իրավունքների համար, բայց շատ ցավում եմ, որ նրանք այդպես չպայքարեցին իրենց հայրենիքի համար:
Կարդացեք նաև
Հիմա կարելի է անվերջ մխրճվել անցյալի մեջ և քննարկել, թե ինչու իշխանությունը հանձնվեց Կարեն Կարապետյանին, բայց եթե այս բոլոր հարցերը տվողները 2018-ին մեր կողքին կանգնած լինեին, իրավիճակն այլ կլիներ: Դուք մոռանում եք, թե ինչ հանրային ճնշում կար, երեխաներին և կանանց էին առաջին պլան հանել:
Ավելի հանդուրժող և ժողովրդավար, քան մեր իշխանությունն էր, դեռևս մեր երկրում չի եղել: Այն բոլոր մարդիկ, ովքեր մտահոգ են իրենց երեխաների և մեր հայրենիքի ապագայով, թող դուրս գան փողոց: Ես վստահ եմ, որ փետրվարի 20-ին ժամը 3-ին փողոց դուրս կգան բոլոր արժանապատիվ մարդիկ»,- ասաց Կարինե Աճեմյանը:
Նելլի ԳՐԻԳՈՐՅԱՆ
