2020 թվականի սեպտեմբերի 27-ին Ադրբեջանի կողմից սանձազերծված պատերազմի հետևանքով տեղահանված և Դիլիջանում ժամանակավոր ապաստանած 5 գործազուրկ արցախցիներ ապահովվել են ժամանակավոր աշխատանքով:
Վարձատրվող հասարակական աշխատանքների կազմակերպման միջոցով արցախցի քաղաքացիները երկու ամիս զբաղվելու են Դիլիջանի ավագ դպրոցին կից շինության վերանորոգմամբ և տարածքի բարեկարգմամբ:
Դիլիջանի զբաղվածության կենտրոնի տնօրեն Կարեն Հովհաննիսյանը մեր զրույցում նշեց, որ վարձատրվող հասարակական աշխատանքը ստեղծվել է հենց աշխատանքի կարիք ունեցող Արցախի բնակիչների համար. «Սա համարվում է ժամանակավոր զբաղվածություն և աշխատանքները նախատեսված են երկու ամսվա համար: Այս պահին հինգ արցախցի են աշխատում»:
Հովհաննիսյանի խոսքով՝ Դիլիջանի զբաղվածության կենտրոնին աշխատանք կատարելու պատրաստակամությամբ մինչև այսօր 40-ից ավելի արցախցիներ են դիմել. «Կան տարբեր բնագավառի մասնագետներ, ուսուցչից սկսած՝ մինչև շինարար և գյուղացի: Հիմնականում դիմում են Շուշիի և Հադրութի բնակիչները, որոնք անժամկետ ժամանակավոր կացարաններում են բնակվում և ունեն զբաղվածության խնդիր»:
Կարդացեք նաև
Հովհաննիսյանի փոխանցմամբ՝ այս պահին մշտական աշխատանքով ապահովված արցախցիներ դեռ չկան, քանի որ Դիլիջանում կա աշխատատեղի խնդիր. «Սակայն հուսով ենք, որ եղանակների լավանալուն զուգահեռ՝ ռեստորաններում և սննդի կետերում կլինեն թափուր աշխատատեղեր և որոշ քաղաքացիներ կապահովվեն աշխատանքով»:
Սաթենիկ ՀՈՎՍԵՓՅԱՆ
Լուսանկարը՝ Դիլիջանի զբաղվածության կենտրոնի էջից
