«Մեր երկրում ինչ-որ բան է կատարվում, եթե տվյալ անձը (Նիկոլ Փաշինյանը-Գ.Հ.) դեռ աթոռին նստած է, դա ողբերգություն է ինձ համար…Մենք շփացած սերունդ ենք, որովհետեւ կարողացանք առանց զենքի դուրս գալ հրապարակ, երկաթե վարագույրի դեմ ու հաղթել` մեր պահանջը հնչեցնելով աշխարհին, որը շղթայական ռեակցիա եղավ ամբողջ Սովետական Միությունում: Հետո բոլոր պետությունները սկսեցին գլուխ բարձրացնել իրենց անկախության համար…Իսկ այսօր մեր այս վիճակն ինձ համար անհասկանալի է»,-«Հայելի» ակումբում կայացած ասուլիսում նշեց երգչուհի Շուշան Պետրոսյանը:
«Եթե հեղաշրջումն արվեց ֆեյսբուքով, հիմա էլ միտինգներն էլ են ուզում ֆեյսբուքով անել, մարդիկ ալարում են դուրս գալ փողոց, բայց դա սխալ է, այդպես չի լինում, տանը նստած հնարավոր չէ ինչ-որ բան փոխել: Եվ երկիրը ծախածները չեն կարող իրենց աթոռներից պոկվել եւ հեռանալ: Չի կարելի այդպես տոլերանդ ասել` ինչ լավ է խոսում այսինչը կամ ինչ լավ է հագնված այնինչը: Ըստ էության որեւէ պոռթկում ես չեմ տեսնում, ինչն ինձ բարկացնում եւ շատ մտահոգում է: Դա շատ վախենալու է…Ամեն օր մի քիչ Հայաստան ենք կորցնում»,-ասաց նա:
Ապա հարց ուղղեց բոլորին. «Ձեզ դո՞ւր է գալիս այս անարժանապատիվ վիճակը…Միշտ հաղթանակած ենք եղել, երկու պատերազմ հաղթած…Մենք ունեինք կանոնավոր բանակ, ունեինք բանակ, որն այսօր լուծարում են… Ունեինք դպրոց, որի դպրոցական ծրագիրը խեղում են, քարկոծում են եկեղեցին, երբ պետականություն չենք ունեցել, միշտ եկեղեցին եղել է… Էս ովքե՞ր են սրանք, ի՞նչ կապ ունեն ինձ հետ, ես հայ եմ, դուք հայ եք… Ի՞նչ կապ ունեն այդ արարածները մեզ հետ, մեր երկրի հետ… Որեւէ բնիկ այդպես չի կարող վարվել երկրի հետ: Կամ պետք է Հուդա լինես, որ 30 արծաթով ծախես երկիրը կամ լինես օտար, այս պարագայում երկուսը միասին է…5000-ից ավելի երեխեքի արյունն իրենց ձեռքերին է: Բոլորն անխտիր, ովքեր աջակցում են այսօրվա իշխանությանը, մասնակիցն են այդ երեխեքի կոտորածի»:
Գոհար ՀԱԿՈԲՅԱՆ
