«Իմ՝ հանրության կողմից հետաքրքրություն ստացած հայտարարությունը խմբագրել եմ երեք անգամ»,- «Արմնյուզ» հեռուստաընկերությանը տված հարցազրույցում խոսելով իր՝ հայտնի հայտարարության մասին՝ պարզաբանեց ՀՀ երրորդ նախագահ, ՀՀԿ նախագահ Սերժ Սարգսյանը:
Նա ասաց, որ այդ հայտարարությունը խմբագրել է երեք անգամ ու պատմեց. «Առաջին անգամ խմբագրել եմ ապրիլի 23-ի առավոտյան, ավելացրել եմ մի քանի նախադասություն, այնուհետև հայտարարության տեքստը դրել եմ կողքի, երեսուն-քառասուն րոպե հանգիստ մտածել եմ, այնուհետև այդ նախադասություններից կրճատել եմ որոշ բաներ, պարզեցրել՝ հաշվի առնելով այն հանգամանքը, որ իմ կարծիքով՝ այդպիսի տեքստը կարող էր իրավիճակը էլ ավելի թեժացնել: Եվ երբ էլի որոշ ժամանակ մտածելուց հետո իմ պատկերացմամբ այդ տեքստը արդեն իր վերջնական տեսքն ուներ, հրավիրել եմ վարչապետի տեղակալ Կարեն Կարապետյանին և ուղիղ նրան հարցրել՝ ասելով՝ Կարե′ն ջան, ես կարծում եմ, որ հանգուցալուծումը կարող է լինել՝ իմ հեռանալով: Պատրա՞ստ ես արդյոք այս իրավիճակում ամբողջ պատասխանատվությունը վերցնել քեզ վրա: Նա անմիջապես ասաց՝ այո, ինչը ես գնահատում եմ: Ասացի՝ ուրեմն պայմանավորվենք հետևյալ կերպ: Մենք որոշ ժամանակ հետո պետք է գնանք նախագահական. էնտեղ խորհրդակցություն կար Վեհափառ հայրապետի մասնակցությամբ, և այդ խորհրդակցությունից անմիջապես հետո կարող ես գնալ մեկուսարան և նրանց հայտնել, որ ես այսօր հրաժարական եմ տալու, թող նրանք իրավիճակը լիցքաթափեն: Չմոռանանք, որ հաջորդ օրը ապրիլի 24-ն էր: Պայմանավորվեցինք: Խոսքը գնացել է իմ հրաժարականի մասին»:
Լրագրողի դիտարկմանը՝ ապրիլի 23-ին ներկայիս իշխանության ներկայացուցիչները հաղթանակ էին տոնում, հնարավո՞ր է Կարեն Կարապետյանն այլ բան էր ասել մեկուսարանում, Սերժ Սարգսյանը պատասխանեց. «Ես չեմ կարծում, որ Կարապետյանն այլ բան է ասել: Կարապետյանը նրանց հետ չէր խոսել իշխանության փոխանցման մասին, Կարապետյանը նրանց ասել էր, որ ես հրաժարական եմ տալիս: Դրանից հետո ես Կարեն Կարապետյանին ցույց եմ տվել իմ հրաժարականի տեքստը և նրա խնդրանքով ևս մեկ պարբերություն հանել: Դա արդեն երրորդ խմբագրումն էր»:
Հարցին՝ կասե՞ք՝ որը, Սերժ Սարգսյանն այսպես արձագանքեց. «Ես կարծում եմ՝ այսպիսի հարցադրումներով սահուն անցնում ենք 2018-ի իրադարձությունների հարթություն»:
Կարդացեք նաև
Ճշտող հարցին՝ Դուք հասկացրե՞լ եք Կարեն Կարապետյանին, որ ոչ թե նրանց, այլ Կարապետյանին եք իշխանությունը փոխանցում, որ Կարապետյանին իշխանություն է փոխանցում ոչ թե գործող իշխանություններին փոխանցելու հաշվարկով, այլ որ իրենք եք վստահում պետության կառավարումը, Սերժ Սարգսյանը պատասխանեց. «Խոսակցությունն ուղիղ այդպես եղել է: Բացի դրանից ես ապրիլի 23-ին վարչապետ էի, Կարեն Կարապետյանը՝ առաջին տեղակալ: Վարչապետի հրաժարականից հետո երկրի կառավարումն անցնում է առաջին տեղակալին: Դա միանշանակ է. այդտեղ որևէ կասկած չկա: Իմ ասածի մեջ որևէ միտում չկա, որ սրանց՝ իշխանության գալուն ես որևէ մեղք կամ հանգամանք չունեմ: Ուղղակի ես ասում եմ իրականությունը: Ես ուղղակի եմ ասում՝ չմեղադրելով Կարեն Կարապետյանին»:
Տաթև ՀԱՐՈՒԹՅՈՒՆՅԱՆ
