Որ արտահերթ ընտրություններ եղան, դուք մասնակցելո՞ւ եք: Այսօր Ազատության հրապարակում լրագրողները հարցրեցին «Ազատություն» կուսակցության նախագահ Հրանտ Բագրատյանին: Նա անվարան պատասխանեց. «Անպայման»: Նրա խոսքով՝ 16 կուսակցությունները շատ տարբեր են ու միասնական մասնակցելու հարց չի դիտարկվում:
Հարցին՝ այսինքն, 16 ուժերը միասնական չե՞ն՝ Հրանտ Բագրատյանը պատասխանեց. «Ո՞նց միասնական չեն: Տարբեր ուժեր են՝ սոցիալիստական, ոչ սոցիալիստական: Դա նորմալ է, քաղաքացիները պիտի հասկանան, որ կակռազ պիտի միասնական չլինենք: 5-6 ուժ պետք է ամեն մեկը 10 տոկոսով անցնի, սա՛ է դեմոկրատիան, ոչ թե 85 տոկոսանոց պառլամենտը, ինչ ուզում՝ անում է»:
Ըստ Բագրատյանի, եթե Փաշինյանի իշխանության օրոք ընտրություններ լինեն, նա կեղծելու է ընտրությունները, որ մնա. «Մենք որ եկանք իշխանության՝ Նիկոլն անպայման ձերբակալվելու է: Հեն է, արդեն իր դատարաններն է ստեղծել՝ ապօրինի ձեւով,ապօրինի ձեւով ՍԴ ստեղծեց, ինքը Լինչի դատաստանին պատրաստվում է»:
Կարդացեք նաև
Հարցրեցինք՝ լավ, հիմա փողոցային տարբերակով իշխանափոխությունը տապալվում է, ի՞նչ է լինելու՝ Հրանտ Բագրատյանը պատասխանեց. «Չի տապալվում: Կանենք: Ես որ Սյունիք, մարզեր գնում եմ՝ բոլորը Նիկոլի դեմ են: Առաջ 15-20 տոկոսն էր դեմ, հիմա՝ բոլորը: Մի 15-20 տոկոս կա, որ աղքատ է ապրում, կամ չի ուզում, կա՛մ այնպես է ստացվել՝ կյանքը չի դասավորվել, վատ է ապրում, ինքը դրանց դարձրեց իրեն հենարան: Հիմա այդ հենարանը իր տակից գնում է: Այսօր ամսի քանի՞սն է՝ ամսի 15-ը, հիմա կլինի ժամը 17:30, հենց այս պահին շանս ունի կենդանի մնալով հեռանա»: Հարցրեցին՝ այլապե՞ս՝ Բագրատյանը պատասխանեց. «Այլապես գնալու է սրացում ու պարտվող կողմը Նիկոլ Փաշինյանն է»: Մեր հարցին՝ այսինքն, բռնի ուժով եկած իշխանության վրա՞ պիտի հենվի այս ժողովուրդը՝ Բագրատյանը պատասխանեց. «Բռնի ուժով չեն գալիս: Որ դու գնացիր իր վրա կրակեցիր, ես ո՞նց եմ իրեն պաշտպանելու: Ես դրանից հետո իրեն չեմ կարող պաշտպանել: Երբ 100-200 հազար դառավ, մենք ո՞նց ենք կազմակերպելու: Մենք ասում ենք՝ հեռացի՛ր, ընկեր: Մարդկանց մեջ ատելություն կա, 1827 հատ տղա կա, որ ոտ ու ձեռ չունի, նրանք պատրաստ են փրթելու, նրանք տեսել են, թե ոնց են այնտեղ իրենց ասում՝ հետ քաշվի ծախած է եղել ամեն ինչ: Ես ո՞նց եմ այդ ամեն ինչը կանգնացնելու: Մարդավարի Նիկոլին քանի անգամ բացատրել եմ՝ գնա: Լավ, չե՞ս հասկանում, որ պարտվել ես, քո պատճառով ենք պարտվել»:
Մեր դիտարկմանը՝Փաշինյանն ասում է՝ «հետ քաշվելու» հրահանգները լրիվ ուրիշ տեղերից ու ուրիշ խողովակներով են եկել զինվորներին՝ Հրանտ Բագրատյանը պատասխանեց. «Պուտինին լսե՞լ ես: Շուշիում ամսի 19-ին մեր տղերքը առյուծի պես կռվում են, Ալիեւը զանգում է Էրդողանին, ասում՝ էլ չեմ կարում: Պուտինը հոկտեմբերի 19-ին զանգում ասում է՝ լսի, Նիկոլ, Քելբաջարը ձեզ, Լաչինը ձեզ, Շուշին ձեզ, Հադրութից մի քիչ վեկալենք, Ֆիզուլի, Ջաբրայիլի հետ, ջհանդամ գյոռ: Պուտինը չի՞ ասել»:
Երբ փոխանցեցինք՝ իշխանականներն էլ հակադարձում են, ասում են՝ հոկտեմբերի 20-ին նույն իրավիճակն էինք ունենալու, ինչ նոյեմբերի 9-ին, օրինակ, Ալեն Սիմոնյանն է ասում՝ Բագրատյանը պատասխանեց. «Արա, Ալեն Սիմոնյանն ո՞վ է: Գոնե հասկանո՞ւմ են ինչ են ասում: Պուտինն է ասել՝ հայ ժողովրդի համար»:
Հռիփսիմե ՋԵԲԵՋՅԱՆ
