Հայաստանը, լինելով միջին եւ ցածր եկամուտ ունեցող երկիր, մանկական քաղցկեղով երեխաների ապրելիությունը մոտ է զարգացած երկրների ցուցանիշներին: Այսօր Մանկական քաղցկեղի դեմ պայքարի համաշխարհային օրվա առիթով հրավիրած ասուլիսում ասաց Հայաստանի մանկական քաղցկեղի եւ արյան հիվանդությունների կենտրոնի ղեկավար Գեւորգ Թամամյանը: Նա, հղում անելով Առողջապահության համաշխարհային կազմակերպության տվյալներին, ասաց, որ քաղցկեղ ունեցող երեխաների 80 տոկոսն առողջանում են բարձր եկամուտ ունեցող երկրներում: Ցածր եւ միջին եկամուտ ունեցող երկրներում այդ ցուցանիշը 20 տոկոսի սահմաններում է:
«Մեր երեխաների ապրելիության ցուցանիշները մոտենում են 70-75 երբեմն՝ 80 տոկոսի: Եվ դա սուղ գումարների պարագայում»,-ասաց բժիշկ Թամամյանը՝ նշելով, որ մեր երկրում տարեկան արձանագրվում է մանկական քաղցկեղի 80-100 նոր դեպք:
Գեւորգ Թամամյանն ասաց, որ Արյունաբանական կենտրոնում բուժում ստացող բոլոր երեխաների դեպքերի վերաբերյալ քննարկումներ են լինում աշխարհի լավագույն մասնագետների հետ, ինչը, ոչ միայն պացիենտի համար է լավ, այլ բժիշկների, որոնք կրթական մեծ առաջընթաց են ունենում նման խորհրդատվություններից:
Կարդացեք նաև
Նրա ներկայացմամբ, «Սիթի օֆ Սմայլ/Ժպիտների քաղաք» բարեգործական հիմնադրամի աջակցությամբ Հայաստանում կստեղծվի պալիատիվ կենտրոն, որը շուտով կբացվի: Երեխաներն այստեղ կստանան ամոքիչ բուժում: Բժիշկը կարեւոր համարեց, որ մեր երկրում մանկական քաղցկեղի բուժումն անվճար է: Ասաց նաեւ, որ կենտրոնում բուժվող երեխաներն ու նրանց ընտանիքի անդամները ստանում են անվճար սնունդ ու հոգեբանական աջակցություն:
Գեւորգ Թամամյանը հույս հայտնեց, որ դեղորայքի բեռը պետությունը կվերցնի իր վրա. մինչ այժմ մեծ մասը հոգում է հիմնադրամը: Ասաց նաեւ, որ տասնամյակներ շարունակ դեղորայքի գրանցման խնդիր կա. «Մենք շատ փոքր երկիր ենք եւ դեղագործական շատ ընկերություններ չեն ցանկանում գալ եւ այստեղ ներկայացված լինել: Հույս ունեմ, որ դեղերի առումով պետական միջամտությունը կմեծանա»:
Պրոֆեսոր Ռ. Հ. Յոլյանի անվան Արյունաբանական կենտրոնի տնօրեն Սամվել Դանիելյանի խոսքով, եթե 90-ականների կեսերից ունենում էինք 3-5 տոկոս առողջացում, այսօր յուրաքանչյուր տասը երեխայից 7-ը, երբեմն՝ 8-ը լիարժեք առողջանալու հնարավորություն ունի. «Սա բժիշկների մի մեծ խմբի անքուն գիշերների ու տքնաջան աշխատանքի արդյունքով է ստեղծվել: Հայ երեխան, որը հիվանդանում է Մեղրիի կամ Նոյեմբերյանի գյուղերում, կարող է լիարժեք ստանալ այն բուժումը, որը ստանում է Լոնդոնում կամ Ֆրանկֆուրտում հիվանդացած երեխան»:
Բայց, ինչպես կենտրոնի տնօրենը նշեց, արդյունքների առումով դեռ զիջում ենք Արեւմուտքին:
Լուսինե ԲՈՒԴԱՂՅԱՆ
