Ադրբեջանի նախագահ Իլհամ Ալիևը հայտարարել է, որ հնարավոր է համարում երկաթուղային հաղորդակցության բացումը Հայաստանի և Ռուսաստանի միջև Ադրբեջանի տարածքով, և Ռուսաստանի ու Իրանի միջև՝ Նախիջևանի տարածքով:
«Մենք առաջարկել ենք, որ տարածաշրջանում տրանսպորտային նախագծերը պետք է առանձնահատուկ դեր խաղան մեր տարածաշրջանի երկարաժամկետ զարգացման գործում՝ ապահովելով կայունություն և զրոյի հավասարեցնելով պատերազմի ռիսկերը, և որ մասնակցող երկրները միայն կշահեն դրանից: Ադրբեջանը կկապվի Նախիջևանի Ինքնավար Հանրապետության և Թուրքիայի հետ: Միաժամանակ կբացվի երկաթուղային ճանապարհ Ռուսաստանից Հայաստան: Այդ գիծը կարող է անցնել միայն Ադրբեջանի տարածքով»,- ասել է Ալիևը Արցախի գրավված տարածքներ իր այցի ժամանակ:
Նա նաև հայտարարել է, որ կբացվի երկաթուղային հաղորդակցություն Ռուսաստանի և Իրանի միջև Նախիջևանի տարածքով: «Իրանի և Հայաստանի միջև կա երկաթուղային հաղորդակցություն: Թուրքիայի և Ռուսաստանի միջև կա երկաթուղային հաղորդակցություն: Այսինքն` դրանից միայն կշահեն տարածաշրջանի բոլոր երկրները»,- ասել է Ալիևը:
Պատրաստեց՝ Վիկտորյա ԱՆԴՐԵԱՍՅԱՆԸ
