«Առաջին լրատվական»-ի հարցերին պատասխանել է Շուշիի քաղաքապետ Արծվիկ Սարգսյանը:
– Տեսակետ կա, որ եթե արցախցիների կացարանի հետ կապված խնդիրները չլուծվեն, նրանց չկարողանան տեղավորել Արցախում, սոսկալի միգրացիա է լինելու: Այս պահին Շուշիից քանի՞սն են մնացել Հայաստանում, ի՞նչ խնդիրների առաջ են կանգնած:
– Երևի մեր բնակչության 40 տոկոսը Հայաստանում է: Հստակ թիվ չեմ կարող ասել, որովհետև անընդհատ գնում են, գալիս: Իհարկե, պետք է մարդկանց կացարանի հարցը լուծվի: Արցախի նախագահը հայտարարել է, որ 2-2,5 տարվա մեջ պետք է մարդկանց կենցաղային հարցերը, այդ թվում՝ կացարանի հարցերը լուծվեն: Այս ընթացքում էլ վարձի գումար են տրամադրում՝ 30 հազար մարդու Հայաստանում, 45 հազար մարդու էլ՝ Արցախում:
– Նախորդ անգամ Դուք նշեցիք, որ շուշեցիները խնդիրներ ունեն, ուտելիքի խնդիր կա, որն այլևս չեն տալիս, կացարաններից հանում են: Հիմա ի՞նչ վիճակ է:
Կարդացեք նաև
– Այո, համայնքներ կան, որ վիճակը լավ է, բայց համայնքներ էլ կան, որ սնունդ չի տրամադրվում: Հյուրանոցներում էլ արդեն մարդկանց ժամանակ են տալիս, որ դուրս գան: Ինչ հնարավոր է, մենք փորձում ենք անել, աջակցել:
– Պետությունն այս դեպքում ի՞նչ աջակցություն է ցուցաբերում դրսում հայտնվածներին:
– Առայժմ դրսում մնացածներ չկան: Հեռախոսով զանգում են, հարցերը կարգավորում ենք: Երևանում էլ ունենք ներկայացուցիչ Շուշիի հետ կապված: Իրենք էլ փորձում են հարցերին լուծում տալ, դեռ էդպիսի դեպք չկա, որ մարդը դրսում մնացած լինի: Երբ մարդկանց ասում են՝ դուրս եկեք, ժամանակ են տալիս, մենք փորձում ենք ուրիշ տեղ տեղավորել:
– Այսօր Հայաստանում կան հազարավոր արցախցիներ և ոչ միայն Շուշիից, որոնք զրկվել են իրենց տներից: Եթե այդ մարդկանց բնակարանի հարցերը չլուծվեն ոչ ՀՀ-ում, ոչ Արցախում, ի՞նչ խնդրի առաջ կկանգնենք:
– Դե ես լսում եմ, որ պետք է լուծվի, հուսով եմ, որ կլուծվի: Մեկ օրում Մոսկվան չի կառուցվել, բայց աշխատանքներ են կատարվում: Ասում են, որ շուտով հազար բնակարան է կառուցվելու Արցախում, էլի կան այդպիսի ծրագրեր: Այդկերպ փորձելու են հարցը լուծել: Ամեն ինչ ցույց է տալիս, որ հարցը լուծվելու է: Իհարկե, մեր բնակիչներին անտերության չեն մատնելու:
Սիրանույշ ՊԱՊՅԱՆ
Հոդվածն ամբողջությամբ՝ «Ժամանակ» թերթի այս համարում
