ԱԺ-ում Ալեն Սիմոնյանի նախագիծն է քննարկվում, որով առաջարկվում է վիրավորանքի եւ զրպարտության համար փոխհատուցման չափերը մեծացնել՝ վիրավորանքի համար սահմանելով 5 մլն դրամ, զրպարտության համար՝ 10 մլն: Կառավարությունն առաջարկում է 2 եւ 3 մլն դրամ սահմանել ու հաշվի առնել մարդու սոցիալականն վիճակը, գույքային դրությունը եւ այլն:
ԲՀԿ պատգամավոր Գեւորգ Պետրոսյանն ասաց, որ չի ընդունում այդ տարբերակումը, որ եթե աղքատ է, ուրեմն պիտի քիչ փոխհատուցում տա. «Եթե աղքատը մեկին ասում է՝ «անբարոյականի վաստակ», միջին ապրելակերպի տերը մեկին ասում է՝ «ավանակի զուգընկեր», մի հատ էլ շատ հարուստ մարդ ասում է՝ «հայրենիքի դավաճան ես դու», այսինքն, հիմա ասում եք՝ կարեւոր չի, թե ինչ է վիրավորել, վիրավորողի սոցիալական դրությունով պայմանավորված սանկցիա պետք է կիրառել: Սա ի՞նչ տրամաբանություն է: Դուք օրենքի նախագիծ եք բերում, անհարմար չե՞ք զգում այս ամեն ինչի համար»:
Գեւորգ Պետրոսյանն ասաց, որ ընդհանրապես կողմ է, որ վիրավորանքը եւ զրպարտությունը քրեականացվի. «Օրինակ, այն օրը մի երկոտանի ինձ նամակ է գրել՝ «սաղ զոհերի մեղավորը դու ես»: Հիմա ես սրան որ տանեմ դատի տամ, դատարաններն եմ ընկնելու տարիներով: 3-4 տարի դատարաններով պիտի ֆռռա, որ Պետրոսյանը Գեւորգը Արցախի զոհերի մեղավորն է»:
Պատգամավորը առաջարկեց նորից հետ գնա նախկին կարգավորմանը ու քրեականացնել, որ վիրավորանքի ու զրպարտության համար արդարացի պատժի արժանանան:
Կարդացեք նաև
Իմքայլական Արուսյակ Ջուլհակյանը Պետրոսյանին հիշեցրեց, որ նամակագրության համար չի կարող դիմել դատարան, վիրավորանքը, ըստ դատական նախադեպերի, պետք է լինի հրապարակային:
Արուսյակ Ջուլհակյանը նույնպես առաջարկեց մտածել զրպարտության, վիրավորանքի համար քրեականացման տարբերակի մասին՝ նշելով, որ հիմա մեր երկրում այլ իրողություն է, բացի այդ, ԵՄ 28 երկրներից 25-ում վիրավորանքն ու զրպարտությունը քրեականացված է:
ԱԺ նախագահ Արարատ Միրզոյանն էլ հայտարարեց. «Ես անցնում եմ պարոն Պետրոսյանի եւ տիկին Ջուլհակյանի կողմը, պետք է լրջորեն մտածել այդ մասին»:
Հռիփսիմե ՋԵԲԵՋՅԱՆ
