Հայ ռազմական և քաղաքական գործիչ, Արցախի Հանրապետության Ազգային ժողովի նախկին պատգամավոր, «Միացյալ Հայաստան» կուսակցության ղեկավար Վահան Բադասյանը բերման ենթարկվեց, ձերբակալվեց, ապա դատարանի որոշմամբ կալանավորվեց հայոց հերոսության ու ցավի սրբավայր դարձած պանթեոնում՝ Եռաբլուրում, հնչեցրած իր խոսքերի համար, որոնք հուսահատ ցասման զգացմունքային պոռթկում էին:
Հայրենազրկման ու ավերի, Հայաստանի ու Արցախի տարածքային ամբողջականության կորստի, սահմանների բռնի վերաձևման, մեր անվտանգության սպառնալիքների ուղղակի մեղավորները բացահայտված չեն դեռևս, ոչ մի մակարդակի պետական պաշտոնյա հիմնավոր, համոզիչ բացատրություն չի ներկայացրել, թե ինչո՞ւ ձախողվեցինք, ովքե՞ր են բանակի ու պաշտպանության տարբեր օղակներում առաջացած քաոսի, անկազմակերպության պատասխանատու ապիկարները: Կալանավորված չեն բանակի համար անպիտան զենք ու զինամթերքի գնումներ բոլոր իրականացնողները, թյուր հրամաններ ու գործողություններ կատարողները:
«Ժառանգություն» կուսակցությունը այս համապատկերում առողջական լուրջ խնդիրներ և հայրենիքին մատուցած անուրանալի ծառայություններ ունեցող Վահան Բադասյանի կալանքը համարում է անարդար և ոչ իրավաչափ: Ելնելով իրավական օրենքների և բարոյական արժեքների թելադրանքից՝ առաջարկում ենք ՀՀ պատկան մարմիններին հնարավորինս արագ փոխել Վահան Բադասյանի խափանման միջոցը՝ կալանքը փոխարինել բնակավայրից չբացակայելու ստորագրությամբ, որի շնորհիվ անհապաղ բժշկական միջամտության կարիք ունեցող Բադասյանին հնարավոր կլինի անհրաժեշտ օգնություն ցուցաբերել: Ողջամիտ լայնախոհության և արդարամտության ժամանակն է:
«Ժառանգություն» կուսակցության վարչություն
