Այսօր ԱԺ-կառավարություն հարցուպատասխանի ժամանակ պատգամավոր Նազելի Բաղդասարյանն ասաց, որ Շիրակի մարզում գերիների, անհետ կորածների հարազատները միջպետական ճանապարհ են փակել ու ուզում են հանդիպել վարչապետի հետ, դժգոհ են: Վարչապետ Նիկոլ Փաշինյանը պատասխանեց. «Դժգոհություն կա ոչ միայն Շիրակի մարզում, դժգոհություն կա նաեւ կառավարությունում: Բոլորս էլ դժգոհ ենք, այսօր այդ իրավիճակից որեւէ մեկը գոհ չի»:
Նա ասաց, որ Շիրակի մարզ այց են պլանավորում, որտեղ հանդիպումներ կունենան քաղաքացիների հետ ու կհանդիպեն նաեւ գերիների հարազատների հետ. «Գերիների խնդրի մասին ինձ հիշեցնելու անհրաժեշտություն չկա, որովհետեւ մենք ոչ մի վայրկյան այդ խնդրի մասին չենք մոռանում: Դրա հետ կապված օբյեկտիվորեն մեզ որեւէ գործողության դրդելու համար որեւէ ակցիա անելու անհրաժեշտություն չկա, որովհետեւ այդ ակցիաները մեր գլխում են, մեր մտքում են եւ մեր սրտում են: Սա այն դեպքն է, երբ մենք պետք է առաջնորդվենք բժշկական սկզբունքով, առաջինը չվնասենք»:
Վարչապետն ասաց, որ ռուս գործընկերները ակտիվ ներգրավված են ու զբաղվում են խնդրով: ՌԴ նախագահն էլ ստորագրել է նոյեմբերի 9-ի փաստաթուղթը, որով ամրագրված է գերիների, ռազմագերիների, այլ պահվող անձանց վերադարձը:
Կարդացեք նաև
Հռիփսիմե ՋԵԲԵՋՅԱՆ
