Շիրակի մարզից 54 գերեվարվածների հարազատներն այսօր փակել էին Արմավիր-Գյումրի, Գյումրի-Երևան մայրուղին, հավաքվել Հոռոմի խաչմերուկում, ավելի ուշ փակել էին նաև Գյումրի-Վանաձոր մայրուղին։ Նրանք առավոտյան եղել են նաև Շիրակի մարզպետարանում, զրուցել նորանշանակ մարզպետ Հովհաննես Հարությունյանի հետ։
Հարազատների պահանջը մեկն է՝ ամեն ինչ անել վայրկյան առաջ իրենց տղաներին տուն վերադարձնելու, սպասել այլևս անհնար է։ Նրանց հանդիպումները, բողոքի ցույցերը տեղի են ունեն առանց հրապարակայնացման։
Խաղաղ պայմաններում Խծաբերդի հատվածից գերի ընկած երիտասարդներից մեկի հարազատներն ասացին, որ իրենք առավոտյան եղել են մարզպետարանում, զրուցել Շիրակի մարզպետի հետ, նրան ասել են, որ պիտի փակեն բոլոր ճանապարհները։
Շիրակի մարզպետ Հովհաննես Հարությունյանն էլ լրագրողների հետ զրույցում ճանապարհների փակ լինելն այսպես մեկնաբանեց․ «Մենք ունեցել ենք և ունենք հետպատերազմյան խնդիրներ։ Այդ խնդիրները լուծման փուլում են, այո՛, մենք բոլորս էմոցիոնալ, հուզական ծանր վիճակում ենք, բայց հավաստիացնում եմ, որ այդ խնդիրների լուծման համար երկրի ղեկավարությունն ամենօրյա ռեժիմով աշխատում է։ Լուծումներն արդեն մենք օր օրի տեսնում ենք, երեկ էլ զգացինք»։
Կարդացեք նաև
Նկատենք, որ Վահան Թումասյանը ֆեյսբուքյան իր էջում հայտնում է. «Միչև Հոռոմ գյուղի խաչմերուկ ավելի քան 15 կմ ճանապարհ կա, սակայն ամբողջ ճանապարհը այս պահին փակ է հսկայական խցանումներ են: Սա Կարկաչան ռեստորանի մոտ է…»:
Նշենք, որ երեկ հայրենիք վերադարձան ևս հինգ գերիներ, նրանցից երեքը Գյումրիից էին, Ոսկեհասկի պահեստազորայիններից։ Շիրակի մարզի 62 գերեվարվածներից 8-ն արդեն վերադարձել են։
Նունե ԱՐԵՎՇԱՏՅԱՆ
Լուսանկարը՝ գերիների հարազատների նախորդ բողոքի ցույցերից է
Փաստորեն Գյումրիից սկսած տասնյակ կիլոմետր ձգվող մեքենաների խցանումներ են... Ով է տեղյակ Գյումրի Երևան ճանապարհները այսօր բացվելու են։ Երկու մայրուղիների Հոռոմի և Գուսանագուղի հատվածները գերի ընկածների և անհետ կորածների հարազատները ժամեր առաջ փակել են և այս պահին էլ մեքենաների հսկայական կուտակումներ է գոյացել։ Կան խոսակցություններ, որ գիշերը ևս փակ է մնալու․․․
Posted by Vahan Tumasyan on 2021 թ. փետրվարի 10, չորեքշաբթի
