Այսօր ԱԺ-կառավարություն հարցուպատասխանի ժամանակ «Իմ քայլը» խմբակցության պատգամավոր Վիկտոր Ենգիբարյանը ՊՆ նախարար Վաղարշակ հարությունյանին հարցրեց ՄՈԲ-ի վճարումների հետ կապված, որոշ վճարումներ ուշացել են ու խնդիրներ են առաջացել:
Նախարարը պատասխանեց. «Ինչ վերաբերում է ՄՈԲ ռեսուրսների վճարմանը, այսօր չի վճարվել մոտ 3-4 տոկոսը: Պատճառներից առաջինը՝ նա, ով չի ներկայացրել անձնական տվյալները եւ երկրորդը՝ նա, ով դուրս է եկել զինկոմիսարիատի հանձնարարությամբ եւ զորամաս չի հասել: Բնական է, այստեղ հաշվառման հարց է առաջանում: Այդ գործընթացը գնում է, եւ մենք համարում ենք, որ մինչեւ մարտի 1-ը հաշվառման խնդիրները կլուծենք ու կվճարենք: Երկրորդ պրոբլեմատիկ հարցը այն մարդկանց մասին է, որոնք կամավոր գնացել են, զորամասում չեն գրանցվել, որպեսզի մենք այդ վճարումներն իրականացնենք, պահանջում ենք, որ այն զորամասում, որտեղ մասնակցել են ներկայացնեն տվյալներ: Հենց դա ստանում ենք՝ վճարում ենք»:
Իմքայլական Նարեկ Մկրտչյանն էլ հարցրեց պատերազմի ժամանակ վիրավորում ստացած զինծառայողների բժշկական ծառայություններից:
Կարդացեք նաև
Առողջապահության նախարար Անահիտ Ավանեսյանն ասաց, որ նրանց ամբուլատոր եւ ստացիոնար բուժումն ամբողջությամբ իրականացվում է պետբյուջեի հաշվին: Իսկ այն զինծառայողները,որոնց բուժումը նպատակահարմար է իրականացնել արտերկրում, նրանց հարցը քննում է հատուկ հանձնաժողովը: Այս պահին 12 դիմում կա, ընթացքի մեջ է:
Հռիփսիմե ՋԵԲԵՋՅԱՆ
