Լեռնային Ղարաբաղի հարցում Մինսկի խմբի համանախագահների գործունեությունը պետք է շարունակվի: Այս մասին ՏԱՍՍ գործակալության հետ զրույցում հայտարարել է Ռուսաստանի փոխարտգործնախարար Անդրեյ Ռուդենկոն:
«Նրանք կարևոր ներդրում են ունեցել Լեռնային Ղարաբաղի հակամարտության հիմնարար սկզբունքների մշակման գործում, որոնցից շատերն արտացոլված են 2020թ. նոյեմբերի 9-ի հայտարարության մեջ: Դա վերաբերում է Ադրբեջանին Լեռնային Ղարաբաղի շուրջ տարածքների վերադարձին, փախստականների վերադարձին, Հայաստանը Լեռնային Ղարաբաղին կապող միջանցքի պահպանմանը, անվտանգության ապահովմանը, խաղաղապահ գործունեությանը, տարածաշրջանում բոլոր տնտեսական և տրանսպորտային կապերի ապաշրջափակմանը:
Փոխնախարարի խոսքով՝ շարունակում է պահանջված մնալ համապարփակ քաղաքական կարգավորման հասնելու խնդիրը, որը ԵԱՀԿ Բուդապեշտի գագաթնաժողովի որոշումներով դրված է Մինսկի խմբի համանախագահների ուսերին:
«Եռյակը» հզոր միջազգային աջակցություն ունի և կարող է օգտակար լինել փոխադարձ ընդունելի մոտեցումների մշակման հետագա հարցերում, այդ թվում` կարգավիճակի հետ կապված հարցերում: Բայց զգույշ, առանց շտապելու, երբ կգա ժամանակը»,- ասել է Ռուդենկոն:
Կարդացեք նաև
Նա նշել է, որ այժմ ԵԱՀԿ Մինսկի խումբը, նրա համանախագահները կարող էին ակտիվություն ցուցաբերել հայերի և ադրբեջանցիների միջև վստահության ամրապնդման հարցերում: «Քաղհասարակության շրջանակում երկխոսության ձևավորումը կնպաստի տարածաշրջանում իրավիճակի ընդհանուր առողջացմանը, քաղաքական ուղեծրում հետագա քայլերի համար նախադրյալների ստեղծմանը»,- ասել է փոխնախարարը:
Անդրադառնալով տարածաշրջանում ռուս-թուրքական համագործակցությանը՝ Ռուդենկոն նշել է, որ Անկարայի հետ համագործակցությունը կառուցվում է հունվարի 30-ից Աղդամի շրջանում գործող Լեռնային Ղարաբաղի հակամարտության գոտում հրադադարի վերահսկման ռուս-թուրքական կենտրոնի շրջանակում:
«Այդպիսի կենտրոնի բացումը դիտարկում ենք որպես համատեղ ջանքերի լավ օրինակ՝ ուղղված տարածաշրջանում իրավիճակի կարգավորմանը»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
