Երեւանի ավագանին այսօրվա նիստում փոփոխություն կատարեց «Բնակչության հատուկ սպասարկում» ՀՈԱԿ-ի կանոնադրության մեջ: Այն քաղաքացիներին առավել հայտնի է «թաղման բյուրո» անունով:
Այսուհետ նշյալ կազմակերպությունն իրավասու է իրականացնել հարազատ չունեցող եւ սոցիալապես անապահով անձանց հուղարկավորության կազմակերպումը: Նախագծի հիմնավորման մեջ ասվում է. «Նշված ծառայության մատուցմամբ կավելանան կազմակերպության եկամուտներն, արագընթաց ընթացակարգով կլուծվի հարազատ չունեցող եւ սոցիալապես անապահով անձանց, ինչպես նաեւ ազատազրկման վայրերում, բուժհաստատություններում, ծերանոցներում եւ մանկատներում մահացած անձանց հուղարկավորության կազմակերպման խնդիրը»:
Արձագանքելով այս նախագծին, Երեւանի ավագանու «Լույս» խմբակցության ավագանու անդամ Անի Խաչատրյանն ասաց, որ բոլոր իշխանությունների կողմից «թաղման բյուրոն» եղել է ամենաթոթոլ կտորը պաշտոններից, որովհետեւ ամենամեծ փողերը, ամենաշատ կոռուպցիան եղել է այդտեղ. «Դրա համար այնտեղ պետ գնաց մեր ամենաթոթոլ կտորը, մեր աշխատակազմի նախկին ղեկավարը: Այդ կոռումպացված համարվող կառույցին տալ ավելի շատ լիազորություններ, որքանով է ճիշտ: Ինչքանո՞վ կարող ենք վերահսկել, որ օրինակ, Վահե Խաչատրյանի գրպանը շատ մեծ չլայնանա»:
Լուսինե ԲՈՒԴԱՂՅԱՆ
