ԱԺ փոխնախգահ Ալեն Սիմոնյանն այսօր ԱԺ-ում լրագրողների հետ զրույցում ասաց, որ արտահերթ ընտրությունների առաջարկ արել են ու չեն ստացել պատասխան, ուստի այս պահին, եթե կան ուժեր, որոնք դա ուզում են, թող դիմեն ԲՀԿ-ին, ԼՀԿ-ին:
Հարցին՝ բա եթե իշխանափոխության սահմանադրական ճանապարհները փակում եք, չե՞ք կարծում, որ այլ քայլերի կդիմեն՝ Ալեն Սիմոնյանը պատասխանեց. «Ի՞նչ է նշանակում հրաժարվել եք սահմանադրական ճանապարհից: Երբ մենք առաջարկում էինք ընտրությունների գնալ, մեզ մերժում էին, այդ քայլով չեն փակո՞ւմ սահմանադրական ճանապարհը: Ընտրված իշխանությունը, չունենալով պահանջ ընտրություն անելու, ասում է՝ դե որ պահանջ չկա, չեն գալիս նույնիսկ բանակցելու, մենք շարունակում ենք աշխատել, դա հակասահմանադրակա՞ն է: Իսկ ո՞րն է սահմանադրականը: Երբ որ մեր գործընկերները պատրաստ կլինեն քննարկել նման բան, մենք կքննարկենք դա քննարկելու հարցը: Ընդդիմությունը չարձագանքեց: Այսինքն, մենք պետք է անընդհատ մնայինք շրջապտույտի մեջ, տեսնեինք 17-ը երբ է դառնում 15, հետո դառնում է վեցնյակ, հետո Վազգեն Մանուկյանը, հետո Ռոբերտ Քոչարյանը առանձին է մասնակցում, ու այդպես երկիրը պահեինք շրջապտույտի մեջ, մինչեւ ընդդիմությունը կողմնորոշվե՞ր: Հետո գայիք մեզ ասեիք՝ բա աշխատանքներ կան: Դատավոր ենք ընտրում, զինվորներին վերաբերող հարցեր կան՝ ընդդիմությունն ասում է՝ դա այնքան կարեւոր չի: Մեր կողմից ներկայացվել է ճանապարհային քարտեզ: Վարչապետն ասել է, որ մինչեւ հունիս-հուլիս ամիսը այդ ճանապարհային քարտեզը կիրականացվի: Ընդդիմադիր մեր գործընկերները, լավ, ժողովրդին չեն կարողանում լավ առաջարկ ձեւակերպեն, բացի վիրավորանքներ, սպառնալիքներ հնչեցնելուց, թող գոնե քաղաքական դաշտում կարողանան հավաքվեն, մի հատ առաջարկ ձեւակերպեն»:
Լրագրողներն ասացին, որ առաջարկը ձեւակերպել են, Ալեն Սիմոնյանն արձագանքեց. «Հա, ես այդ առաջարկը լսել եմ՝ թող նիկոլ Փաշինյանը հրաժարական տա: Ես էլ ասում եմ՝ իրենք թող բոլորով հրաժարական տան, որ կապ չունեն ՀՀ ժողովրդի հետ»:
Հարցին՝ Նիկոլ Փաշինյա՞նը կապ ունի, նա պատասխանեց. «Այո, ՀՀ վարչապետը ունի ամենաբարձր վարկանիշը ՀՀ-ում՝ առկա քաղաքական գործիչներով: Այո, «Իմ քայլի» եւ մնացած բոլոր քաղաքական ուժերի վարկանիշն ընկել է, բայց ես պնդում եմ, որ այսօր ՀՀ վարչապետն ունի ամենաբարձր վարկանիշը, եթե կա այլ պնդում…»:
Կարդացեք նաև
Ալեն Սիմոնյանն ասաց, որ արտահերթ ընտրությունների կգնան նվազ ցնցումների պարագայում, իսկ դա կլինի այն ժամանակ, երբ ընդդիմությունը գա քննարկման ու գան համաձայնության. «Ասում են՝ կկեղծե՞նք ընտրությունները, ասում են այն մարդիկ, որոնք ամբողջ կյանքի ընթացքում ընտրություն են կեղծե՞լ, դա ծիծաղելի է»:
Հռիփսիմե ՋԵԲԵՋՅԱՆ
