2020-ի նոյեմբերի 9-ին ստորագրած փաստաթղթի արդյունքում Արցախի Քարվաճառի շրջանը հանձնվեց Ադրբեջանին։
Նույն թվականի նոյեմբերի վերջին ՌԴ խաղաղապահ ուժերի միջնորդությամբ պայմանավորվածություն է ձեռք բերվել, ըստ որի` ուխտավորների մուտքը ՌԴ խաղաղապահ ուժերի վերահսկողությամբ թույլատրվում է Դադիվանք։
Ինչպես մեզ տեղեկացրեցին, մեկ օր առաջ` փետրվարի 7-ին, Արցախի մայրաքաղաքի Վերածննդի հրապարակից պետք է ուխտավորների խումբը խաղաղապահների ուղեկցությամբ մեկներ Դադիվանք։
Երբ խումբը հասավ Դադիվանք, մեքենան մոտեցավ վանական համալիրի տարածքին մոտ տեղակայված ադրբեջանական անցակետին, սակայն ադրբեջանցիները արգելեցին մուտքը Դադիվանք` պատճառաբանելով, թե իրենք տեղեկացված չեն դրա մասին։
Կարդացեք նաև
ՌԴ խաղաղապահներն ու խմբի պատասխանատուն պարզաբանեցին, բացատրեցին, ասացին, որ բոլորն էլ տեղեկացված են, սակայն ադրբեջանցիներն ուրիշ որոշում չկայացրեցին, ավելին` ուխտավորներին հետ ուղարկելուց ասացին, որ սպասեն ճշտումներ կատարեն։
3 ժամից հետո ռուս խաղաղապահներն ուխտավորների խմբին կրկին են ուղեկցում Դադիվանք։ Այս անգամ էլ երկար սպասելուց հետո ադրբեջանցիները չհամաձայնեցին բացել ճանապարհը։ Նրանց պատճառաբանությունը հետևյալն էր` հրաման են ստացել արգելել ոչ միայն ուխտավորների, այլև հերթապահության եկած հոգևորականների մուտքը Դադիվանք։
Այդպես էլ ճանապարհը չբացեցին. նոր հրաման է։
Վովա ԱՐԶՈՒՄԱՆՅԱՆ
«Առավոտ». ՌԴ ՊՆ-ն հաղորդում է, որ ռուս խաղաղապահները Ստեփանակերտից Դադիվանք են ուղեկցել 28 հայ ուխտավորների։
