«Բոլորը պետք է հավասար լինեն օրենքի առջեւ: Պարոն Բադասյանը միտք է արտահայտել, բայց նման մտքեր արտահայտել են շատ շատերը եւ թիրախավորել միայն Վահան Բադասյանի՞ն, այստեղ քաղաքական երանգ կա»,- այսօր ՀՀ գլխավոր դատախազության մոտ ի աջակցություն «Միացյալ Հայաստան» կուսակցության նախագահ, ազատամարտիկ Վահան Բադասյանի կազմակերպված բողոքի ցույցի ժամանակ ասաց քաղաքագետ Արա Պապյանը:
Վահան Բադասյանը օրերս հայտարարություն էր տարածել ու կոչ արել միավորվել եւ բողոքի ձայն բարձրացնել, որ դադարեցվեն իր նկատմամբ կիրառվող «ֆիզիկական եւ հոգեբանական խոշտանգումները»:
Հիշեցնենք, որ Բադասյանին կալանավորել են Եռաբլուրում արած իր այն հայտարարությունների համար, որ վարչապետ Փաշինյանին պետք է ֆիզիկապես ոչնչացնել՝ զենքի միջոցով:
Պապյանը գտնում է, որ պետք է Բադասյանին կալանավորելուց առաջ գնահատվեր՝ իր սպառնալիքն իրականանալու հնարավորություն ունե՞ր, թե՞ ոչ. «Մենք հասկանում ենք, որ չկա որեւէ հնարավորություն, միտում էլ չի եղել: Խափանման միջոցը լրիվ սխալ է ընտրված: Վահան Բադասյանը, որ բազմաթիվ վիրավորումներ է ստացել իր՝ տարիներ տեւած հայրենանվեր պայքարի հետեւանքով, այսօր գտնվելով անազատության մեջ, իր առողջությունը, կյանքը վտանգված է: Խափանման միջոցը կարելի է փոխել, ի՞նչ խնդիր կա: Որեւէ մեկը հարց չի դնում՝ Վահան Բադասյանը մեղավո՞ր է, թե՞ ոչ: Այդ հարցը, կարծում եմ, դատարանում կապացուցենք, որ պետք է հպարտանանք Վահան Բադասյանով: Բայց խափանման միջոցը ազատազրկումն ընտրել այն բանի համար, որ մարդը չունի մշտական բնակության վայր՝ այն պարագայում, երբ մարդու հայրենիքը, տունը, ունեցվածքը, նախնիների գերեզմանները, ամբողջ Հադրութի շրջանը թշնամին գրավել է ոչ իր մեղքով…Երկրի սահմանների, տարածքային ամբողջությունը պաշտպանելը իշխանության պարտականությունն է ու պետք չի դա դնել այլ մարդու ուսերին»:
Կարդացեք նաև
Պապյանը պահանջում է հնարավորինս արագ փոխել խափանման միջոցը, ապա անաչառ հետաքննությամբ կապացուցվի նրա անմեղ լինելը:
Հռիփսիմե ՋԵԲԵՋՅԱՆ
