«Իմ քայլը» խմբակցությունը երեկ հայտարարություն է տարածել, ըստ որի խմբակցությունը գտնում է, որ արտահերթ ընտրություններ անցկացնելու հանրային պահանջ չկա։
Լրագրողներն այսօր ԱԺ-ում «Իմ քայլը» խմբակցության ղեկավար Լիլիթ Մակունցին հարց ուղղեցին՝ ինչպե՞ս են չափել հանրային պահանջը։ Ի պատասխան տիկին Մակունցն ասաց․«Հանրային պահանջի ձեւակերպման մեխանիզմներից ամենառաջնայինը ընդդիմության եւ ընդհանրապես քաղաքական ուժերի կողմից ներկայացվելու տեսքով է։ Եվ քանի որ այդ քաղաքական ուժերը, ինչպես մենք նշել ենք, խորհրդարանական ընդդիմությունը, նաեւ արտախորհրդարանական ընդդիմության գերակշիռ մասն այդ պահանջը չի ձեւակերպել, գալով համաձայնության արտահերթ ընտրություններ անցկացման շուրջ՝ ուրեմն այդպես է»։
Լրագրողների դիտարկմանը՝ ընդդիմությունը հայտարարում է, որ Նիկոլ Փաշինյանի՝ արտահերթ ընտրություններ անցկացնելու շուրջ քննարկում անելու պայմանը չեն ընդունում, տիկին Մակունցն ասաց՝ մեր առաջարկը դրական արձագանք չի ստացել արտահերթ ընտրություններ անցկացնելու մասին․«Ինչ վերաբերում է քննարկելու այն պայմաններին, թե ինչպես պետք է դրանք անցկացվեն, իհարկե, դա շատ կարեւոր է, որովհետեւ ընտրություններին մասնակցում է ոչ միայն իշխանությունը, այլ նաեւ ընդդիմությունը»։
Հարցին՝ արդյոք այս կերպ գործընթացը փակուղի կմտնի, քանի որ ընդդիմությունը հայտարարում է, որ եթե սահմանադրական ճանապարհով իշխանափոխություն չլինի, ապա այլ ճանապարհ կլինի, Լիլիթ Մակունցն այսպես պատասխանեց․ «Մենք արդեն նշել ենք, որ ընդդիմության կողմից իշխանափոխության պահանջը մեզ համար հնարավոր է իրականացնել բացառապես ընտրությունների միջոցով, եւ դրանով է պայմանավորված եղել, որ մենք ասել ենք՝ եկեք արտահերթ ընտրություններ անցկացնելու տարբերակը քննարկենք։ Ինչ վերաբերում է մեր հետագա անելիքներին, ապա նշել ենք, որ մենք շարունակելու ենք մեր ճանապարհային քարտեզի իրագործման աշխատանքները, եւ դրանք ամփոփելիս նոր կանդրադառնանք արտահերթ ընտրությունների անհրաժեշտությանն արդեն այդ համատեքստում»։
Կարդացեք նաև
Կրկին անդրադառնալով հանրային պահանջի չափման մասին հարցին, խմբակցության ղեկավարն ասաց, որ հանրային պահանջի լուսաբանողները նաեւ լրատվամիջոցներն են, ընդդիմությունն էլ նաեւ այդ պահանջի հետ առնչվողը՝ քաղաքացիների հետ շփվելիս․ «Հիմա եթե ընդդիմությունը չի տեսնում հանրային պահանջ, որպեսզի գա եւ քննարկի արտահերթ ընտրություններ անցկացնելու հարցը, դա նշանակում է, որ առնվազն այդ ազդակը չեն ստանում։ Եթե ընդդիմությունը կազմակերպում է հանրահավաքներ, որոնց մասնակցում է մի քանի հազար քաղաքացի, եւ իրենք գտնում են, որ դա բավարար պայման չէ արտահերթ ընտրություններ անցկացնելու համար, ապա դա ձեւակերպվում է նաեւ այդպես։»։
Լիլիթ Մակունցը վստահեցրեց՝ իշխող ուժի շփումները քաղաքացիների հետ իրենց չեն հաղորդում արտահերթ ընտրություններ անցկացնելու ազդակներ, բայց սա չի նշանակում, որ իշխանությունը չի անդրադառնալու արտահերթ ընտրություններին՝ ճանապարհային քարտեզը հունիսին ամփոփելիս։
ՀՀ 2-րդ նախագահ Ռոբերտ Քոչարյանի՝ ընտրություններին մասնակցելու եւ հաղթելու մասին հայտարարությունն, ըստ Մակունցի, «Իմ քայլ»-ին չի վախեցրել եւ դա չէ պատճառը արտահերթ ընտրություններից խուսափելու։
ԱՄՆ-ում Լիլիթին Մակունցին ՀՀ դեսպան նշանակելու մասին հարցին էլ վերջին չպատասխանեց, ասաց՝ մեկնաբանություն չունեմ։
Մանրամասն՝ տեսանյութում
Նելլի ԲԱԲԱՅԱՆ
