Լուրեր են շրջանառվում, թե տարբեր մարզաձեւերի մեր առաջատար մարզիկներից ոմանք Հայաստանը լքել են: Մասնավորապես, տրվում են հեծանվորդ Էդգար Ստեփանյանի, հունահռոմեական ըմբիշ Մաքսիմ Մանուկյանի եւ ազատ ոճային Վալոդյա Ֆրանգուլյանի անունները:
Aravot.am-ը այսօր հավաքականների մարզիչներից ցանկացավ ճշտել, թե այդ շշուկները որքանո՞վ են համապատասխանում իրականությանը: Հեծանվային սպորտի Հայաստանի ազգային հավաքականի գլխավոր մարզիչ Արմեն Գյոզալյանը կտրականապես հերքեց Էդգար Ստեփանյանի մասին տեղեկությունը: «Բացարձակ ապատեղեկատվություն է: Այ, ընդամենը 20 րոպեից Էդգարը կողքիս կլինի, գալիս է մարզվելու: Այո, Էդգարը, մանավանդ, վերջին երկու տարիներին ցույց տված արդյունքներից հետո, տարբեր երկրներից լավ առաջարկներ ստացել է, սակայն նա սիրում է իր երկիրը, Հայաստանում է եւ այսօր հանդես է գալիս Հայաստանի պետական դրոշի ներքո»,-ասաց մարզիչը:
Էդգար Ստեփանյան
Ազատ ոճի ըմբշամարտի ազգային հավաքականի գլխավոր մարզիչ Հաբեթնակ Կուրղինյանը Վալոդյա Ֆրանգուլյանի մասին ասաց. «Մեր մարզաձեւում ոչ ես, ոչ ըմբիշը չենք կարող ինքնակամ մտնել հավաքական կամ դուրս գալ: Անցկացնում ենք Հայաստանի առաջնություն եւ դրա արդյունքով կազմավորում հավաքականի թեկնածուների ցուցակը: Վալոդյա Ֆրանգուլյանը Հայաստանի վերջին առաջնությունում պարտվել է իր քաշային կարգում 2-րդ տեղն զբաղեցրած մարզիկին, իսկ չեմպիոնի կոչումը նվաճել է Վազգեն Թեւանյանը, այն ըմբիշը, որը բավականին լուրջ մրցակցության պայմաններում նվաճել է նաեւ աշխարհի գավաթը: Վալոդյային մենք, միեւնույն է, հավաքներին հրավիրել էինք, սակայն նա անցած տարեվերջին մեկնել է Միացյալ Նահանգներ: Սրանից ավելի տեղեկություն չունեմ»:
Վալոդյա Ֆրանգուլյան
Չի կարելի բացառել, որ Ֆրանգուլյանը, որ վերջին շրջանում իր քաշային կարգում առաջատարն էր, մտածել է, թե հավաքականում կարող է, այսպես կոչված, պահեստային մարզիկների շարքին դասվել ու դրա համար է մեկնել: Այնուամենայնիվ, սպասում ենք, որպեսզի ինքն անձամբ լույս սփռի այս հարցի վրա:
Կարդացեք նաև
Ինչ վերաբերում է Մաքսիմ Մանուկյանի մասին տեղեկություն ստանալուն, մեզ հունահռոմեական ոճի ըմբշամարտի հավաքականի մարզիչների հետ հեռախոսակապ հաստատել չհաջողվեց:
Աշոտ ՀԱԿՈԲՅԱՆ
