«Ուսուցիչներ հանուն ազգային կրթության» նախաձեռնող խմբի հայտարարությունը
Սիրելի՛ ուսուցիչներ,
Մեզ վստահված է ապագա սերունդներին կրթելու, նաև դաստիարակելու մեծագույն առաքելությունը:
Այդ առաքելությանը հավատարիմ՝ ձգտել ենք անել ամեն հնարավորն ու անհնարինը:
Կարդացեք նաև
Մեր հազարամյա երազանքն իրականություն է դարձել. վերջապես վերականգնվել է մեր կորսված պետականությունը, և միջազգային հանրության կողմից ճանաչված պետություն ենք:
Սակայն գաղտնիք չէ, որ Հայաստանը ծանր ժամանակաշրջան է ապրում. երկրում իշխանությունը հայտնվել է մարդկանց ձեռքերում, որոնք պետությունը հասցրել են կործանման եզրին: Շարունակվում են խարխլվել մեր պետականության հիմքերը, և վտանգված է ազգի գոյությունը:
Հարգելի՛ գործընկերներ, ժամանակն է ոտքի կանգնելու և միավորվելու, դրսևորելու ակտիվ քաղաքական դիրքորոշում և մեր օրինակով ոգեշնչելու աշակերտին ու ծնողին: Մեր հարմարվողականությունը կամ առաջ քաշվող գաղափարներն այն մասին, որ մեր գործն ամփոփվում է միայն դպրոցում դաս պարապելով, սին են և անհիմն, հաճախ նաև կործանարար:
Մենք՝ ուսուցիչներս, պատասխանատու ենք հայրենիքի վերականգնման և շենացման, մեր հինավուրց ազգի ճակատագրի, մատաղ սերնդի հոգևոր առողջության պահպանման և մտավոր զարգացման համար: Ինչպես նաև մեր անմիջական պարտավորությունն է հայկական քաղաքակրթական ժառանգությունը պաշտպանելու, զարգացնելու սերունդներին փոխանցելը: Չպետք է թույլ տանք ներկա իշխանություններին անխնա մսխել մեր երկրի քաղաքական, տնտեսական, մտավոր, հոգևոր և մշակութային պաշարները: Հարգելով և արժևորելով համամարդկային ձեռքբերումները՝ համոզված ենք, որ ազգային արժեհամակարգով առաջնորդվող դպրոցն է, որ կարող է ապահովել արարչագործ հայի և Հայաստանի՝ որպես պետության գոյությունն ու կենսագործունեությունը: Իսկ այժմյան իշխանությունների առաջարկած կրթական չափորոշիչներն ու ծրագրերը միայն թուլացնում և այլասերում են կրթական համակարգը և, հետևաբար, քանդում պետականության հիմքերը:
Ուստի և՝ կոչ ենք անում ՀՀ բոլոր ուսուցիչներին․
Հարգելի՛ գործընկերներ,
եկե՛ք միասին պաշտպան կանգնենք մեր հավատքին, ազգային արժեքներին, կրթությանն ու դաստիարակությանը, լսելի դարձնենք ուսուցչի խոսքը և պահանջենք այս իշխանությունների հեռացումը, որոնք դեմ են գործել և գործում ազգային դպրոցին, որոնք արժեզրկեցին ամենարժեքավորն ու հոգևորը, պղծեցին հայրենիքն ու մեր տղաների արյամբ սրբագործված հողը:
«ՈՒՍՈՒՑԻՉՆԵՐ ՀԱՆՈՒՆ ԱԶԳԱՅԻՆ ԿՐԹՈՒԹՅԱՆ» ՆԱԽԱՁԵՌՆՈՂ ԽՈՒՄԲ
