«Այն պետությունը, որ կառուցվեց, չէր համապատասխանում մեր երազանքներին, իշխանությունն օտարվեց հասարակությունից, չկար այն արդարությունը, որը մենք ուզում էինք, իշխանությունը վերարտադրվում էր կեղծված ընտրություններով, քաղաքացին իրեն երկրի տեր չէր զգում։ Եվ, դրանից օգտվելով՝ որոշակի ուժեր այդ ուղերձը հղեցին մեր երիտասարդությանը, ժողովրդին, ասելով՝ մենք այդ երկիրը կկառուցենք, երկիր, որտեղ մարդիկ կլինեն ազատ, կլինի արդարություն»,- այսօր երիտասարդների հետ հանդիպման ժամանակ Հայաստանի երրորդ հանրապետության շրջանը վերլուծեց «Հայրենիքի փրկության շարժման» վարչապետի թեկնածու Վազգեն Մանուկյանը։
«2,5 տարի անց, կարող ենք արձանագրել`ի՞նչ շահեցինք եւ ի՞նչ կորցրեցինք։ Շահեցինք ոչինչ, կորցրեցինք գրեթե ամեն ինչ»,- ասաց նա` հավելելով` հարց է ծագում՝ կարո՞ղ ենք մենք ոտքի կանգնել եւ կառուցել այն պետությունը, որը երազում էինք։ «Ես համոզված եմ, որ՝ այո։ Դրա համար պետք են կամք, հավատք եւ աշխատանք։ Եվ մեր երիտասարդության մեջ այդ որակները կան»,- վստահ է Վազգեն Մանուկյանը։
Բայց մինչ այդ, ըստ նրա՝ պետք է գործող իշխանությանը հեռացնել. «Նախ`ցանկացած իշխանություն, որն իր երկիրը բերում է կապիտուլյացիայի՝ պետք է հեռանա։ Մի երկիր, որտեղ չի դատապարտվում վատը եւ չի խրախուսվում լավը՝ ապագա չունի։ Ապա`այս 2,5 տարվա մեջ մենք ոչ մի ոլորտում առաջընթաց չենք ունեցել: Այսինքն, մենք ունենք վատ ղեկավար, վատ մենեջեր»։
Ապագայի հետ կապված մեր հավակնություններն, ըստ Վազգեն Մանուկյանի, պետք է լինեն ազգային. «Մենք այն գրեթե կորցրել ենք Արցախը, բայց պետք է վերադարձնենք։ Երկրորդը` հզոր բանակն է. հարեւանները քեզ պետք է վերաբերվեն հարգանքով, իմանալով, որ չեն կարող քեզ ձեռք տալ, որ դու պաշտպանված ես»։
Կարդացեք նաև
Վազգեն Մանուկյանը կարեւոր է համարում նաեւ Սփյուռքի գործոնը:
Նելլի ԳՐԻԳՈՐՅԱՆ
