Այսօր ՀՅԴ երիտասարդական միության անդամների հետ հանդիպման ժամանակ «Հայրենիքի փրկության շարժման» առաջադրած վարչապետի թեկնածու Վազգեն Մանուկյանը խոսեց շարժումից հիասթափություններից: «Շարժումն արձանագրեց եւ «+»-ներ, եւ «-»-ներ»,- ասաց նա`հավելելով, որ եւ «+»-ներն այն էին, որ բազմաթիվ կազմակերպություններ հրաժարվեցին ներկա վարչապետից`ԳԱԱ-ն, եկեղեցին, տասնյակ այլ ինստիտուտներ: Իսկ «-»-ների շարքում Վազգեն Մանուկյանը նշում է այն, որ չնայած դժգոհ հարյուր հազարավոր մարդիկ կային, բայց շարժումը չկարողացավ անել այնպես, որ այդ մարդիկ դուրս գան փողոց եւ իրենց կամքն իշխանությանը թելադրեն:
«Ոմանք մեղքը գցում են ժողովրդի վրա: Ասում են`սա այն ժողովուրդը չի: Չէ, ժողովուրդը մեղք չունի: Ժողովուրդը միշտ ժողովուրդ է: Պետք է կարողանաս ժողովրդի սիրտը շահել, կարողանաս խելքի վրա ազդել`համոզել`բերել: Բայց կոտրված է մեր ժողովուրդը: Ամենակարեւոր բանն են կորցրել, այստեղ միայն Արցախի հարցը չէ: Կորցրել են հավատ, որ մենք կարող ենք ունենալ նորից ուժեղ պետություն: Չկա հավատ, չկա էներգիա, չկա էներգիա, չկա հավես`փողոց դուրս գալու»:
Ըստ բանախոսի`ժողովրդին այդ կոտրտվածությունից նախ պետք է հանել, ցույց տալ, որ այս ճանապարհը տանում է դեպի անդունդ եւ պետք է կարողանանք այս իրավիճակից դուրս գալ եւ այլ ժողովուրդների հետ լայն ճանապարհով առաջ գնալ: «Մեր ժողովրդին խնամքով է պետք վերաբերվել»,- ասաց Վազգեն Մանուկյանը` հավելելով, որ այդ անելիքում իր տեղն ու դերն ունի երիտասարդությունը:
Մինչ իշխանափոխությունը արտահերթ ընտրություններ անցկացնելը Վազգեն Մանուկյանը համարում է Նիկոլ Փաշինյանի օրակարգը, որը վերջինս կկիրառի, եթե համոզված լինի իր հաղթանակում: Իսկ իր հաղթանակը, ըստ Վազգեն Մանուկյանի, Նիկոլ Փաշինյանը կարող է ապահովել միայն ուժով: Նրա գնահատմամբ, վերջին օրենսդրական փոփոխությունները ցույց են տալիս, որ Հայաստանը կամաց-կամաց դառնում է ոստիկանական պետություն. «ոստիկանական պետությունում, գլխավոր ոստիկանի ղեկավարությամբ գնալ ընտրությունների, ես համարում եմ անիմաստ»:
Կարդացեք նաև
«Հայրենիքի փրկության շարժման» վարչապետի թեկնածուն չի կարող կանխագուշակել, թե ապագայում ի՞նչ կլինի, բայց որ շարժման մասնակիցներն այժմ համախմբված են իրենց օրակարգի շուրջ, հաստատում է:
Նելլի ԳՐԻԳՈՐՅԱՆ
