«Վրաստանում 2021-ին ամենատարածված պատմույթը կապված է լինելու Քովիդի հետ»,- «Մեդիա կենտրոնում» «2020 թվականի հակաարևմտյան, հակալիբերալ տրամադրությունները Կովկասում. պրոպագանդայի խոհանոցի ներսում» թեմայով քննարկման ժամանակ նշեց Ատլանտյան խորհրդի հետազոտող Գիվի Գիգիթաշվիլին:
Հարցին՝ մեդիա դաշտն ի՞նչ կարգավորման խնդիրներ ունի, նա պատասխանեց. «Թե′ քաղհասարակությունը, թե′ կառավարությունը պետք է ուշադրություն դարձնեն այս ամենի բացասական ազդեցության վերացման հարցով: Այսպես ասած՝ խնդիրների, իրավիճակի վերականգնում պիտի կատարվի: Այստեղ և′ կառավարությունը, և′ քաղհասարակությունը շատ անելիքներ ունեն»:
Ըստ նրա՝ չպետք է թողնել, որ տարբեր դերակատարներ չարաշահեն, օգտվեն առիթից: Պետք է պայքարել նաև այն դերակատարների դեմ, որոնք ստեղծում են ապատեղեկատվությունը: Նա բերեց մի շարք օրինակներ. «Օրինակ՝ Ուկրաինայում երեք պրոկրեմլյան ԶԼՄ-ներ արգելափակվեցին, նույնը կա մեզ մոտ՝ Վրաստանում, նաև բալթյան երկրներում: Ընդհանուր առմամբ, այս առումով նկատի ունեմ ապատեղեկատվություն տարածողներին պատժելը, չափազանց կարևոր է: Եթե իրենց արածների համար գին չվճարեն, կզարգացնեն, կշարունակեն իրենց գործողությունները: Պետք է ուշադրություն դարձնել ու զգույշ լինել այս հարցում, որ դա չլինի գրաքննություն կամ քաղաքականապես մոտիվացված գործողություն»:
Հարցին՝ հակալիբերալ պատմույթների ի՞նչ բեռով ենք մուտք գործելու 2021, նա պատասխանեց. «Հիմա պրոկրեմլյան ԶԼՄ-ներն ակտիվորեն տարածում են տեղեկատվությունը ռուսական սպուտնիկ պատվաստանյութի մասին, որ դա լավ է, քան արևմտյանը: Եվ փորձեր են անելու շատ մեղադրանքներ ուղղել ԱՄՆ-ի և արևմուտքի կողմից արտադրված պատվաստանյութերի և համանման ուսումնասիրությունների դեմ: Վրաստանում տնտեսական վիճակն այս պահին այնքան էլ լավ չէ և շարունակում է վատանալ: Այս դերակատարները փորձելու են հասարակությանը համոզել, որ Ռուսաստանի հետ սերտ հարաբերություններ ունենալը և Ռուսաստանի տնտեսության վրա հույս դնելը շատ ավելի օգտակար և արդյունավետ է լինելու այս ճգնաժամից դուրս գալու համար: Արմատականները փորձելու են այս առիթն օգտագործել, գործիք դարձնել իրենց քաղաքական հակառակորդների հետ պայքարում»:
Տաթև ՀԱՐՈՒԹՅՈՒՆՅԱՆ
