Այսօր կառավարության նիստից հետո լրագրողները ֆինանսների նախարար Ատոմ Ջանջուղազյանից հետաքրքրվեցին՝ այս տարվա ավարտին Հայաստանի պետական պարտքը որքա՞ն կկազմի: Ի պատասխան, նախարարն ասաց, որ դա կախված կլինի նրանից, թե տարվա ընթացքում ինչպիսին կլինի փոխարժեքը: Ապա ասաց՝ «Ենթադրվում է կառավարության պարտքը կմոտենա 8.5 միլիարդի, իսկ պետական պարտքը, որն այս դեպքում մոտավորապես 400-500 միլիոնի միջակայքում է, Կենտրոնական բանկի պարտքը կմոտեցնի 8.9 մլրդ դոլարի»:
Հարցին, ո՞րն է պետական պարտքի ամենաբարձր շեմը, այն կարո՞ղ է մոտենալ 90 տոկոսի, Ատոմ Ջանջուղազյանը պատասխանեց, որ զարգացող երկրների համար 70 տոկոսից բարձր պարտք-ՀՆԱ հարաբերակցությունը, երբ հստակ չէ վերադարձի սցենարը, համարվում է միջին ռիսկայնություն ունեցող. «Մենք պետք է հիմա բոլորով դիտարկենք այն սցենարները, որոնք թույլ կտան պարտքը վերադարձնել կառավարելի միջակայքը: Պետք է ջանք գործադրենք, որ վերառանանք այս շեմին: Մենք պետք է մտածենք, ոչ թե պարտքը նվազեցնելու, այլ ՀՆԱ-ի աճելու մասին»:
Լուսինե ԲՈՒԴԱՂՅԱՆ
