Մի խումբ քաղաքացիներ Ռուսաստանի Դաշնությունից հետ էին ուղարկվել՝ Covid-19-ի թեսթի հետ առաջացած տեխնիկական խնդիրների պատճառով: Երեկ նրանք հենց օդանավակայանում բողոքի ցույց էին անում՝ պահանջելով փոխհատուցել իրենց ծախսերն ու իրենց հետ ուղարկել:
Այսօր կառավարության նիստում վարչապետ Նիկոլ Փաշինյանը անդրադարձավ «Ճամփորդիր առանց Covid-19-ի» ծրագրին՝ նշելով, որ այն հաջողությամբ մեկնարկել է. «Էլեկտրոնային պլատֆորմի միջոցով հաստատվում է քաղաքացու թեստի բացասական լինելը, որի արդյունքում քաղաքացին ճամփորդում է ՌԴ: Ծրագիրը հաջողությամբ մեկնարկել է, եւ ընդամենը 7 քաղաքացու դեպքում խոչընդոտ է առաջացել մեկնելու, խոչընդոտը տեխնիկական բնույթի է, իսկ մեկնողների թիվը հազարավոր է: Կարեւոր է արձանագրել, որ նաեւ Հայաստան եկողների շատ մեծ թիվ կա, եւ սա ևս կարևոր է տնտեսության համար, քանի որ նախորդ գրեթե մեկ տարվա ընթացքում բազմաթիվ հայրենակիցներ այդ հնարավորությունը չեն ունեցել»:
Փաշինյանը նաեւ հայտնեց, որ փետրվարի 15-ից օրական չորս կանոնավոր չվերթ է լինելու:
Փոխվարչապետ Մհեր Գրիգորյանն ասաց, որ Հայաստանից արդեն 1423 քաղաքացի մեկնել է, եւ Հայաստան եկել է ՀՀ քաղաքացու անձնագրով 1263 քաղաքացի: Փոխվարչապետի խոսքով, հավելվածը լիարժեք աշխատում է, սակայն կորոնավիրուսի թեսթավորումը պետք է կոնկրետ լաբորատորիաներում տեղի ունենա, որ առցանց ռեժիմով մուտքագրվեն տվյալները:
Կարդացեք նաև
Առողջապահության նախարար Անահիտ Ավանեսյանն էլ ասաց՝ ծրագիրը երկու լաբորատորիայում սկսվեց, բայց եւս վեցը միացել են:
Լուսինե ԲՈՒԴԱՂՅԱՆ
