«Մամուլի մի շարք ներկայացուցիչներ այս օրենքը կապում են աղբյուրների անանունության իրավունքի հետ: Բայց դա որևէ կապ չունի անանուն աղբյուրների հետ»,- «Հոդված 3» ակումբում հրավիրված քննարկման ընթացքում հայտարարեց ՀՀ ԱԺ «Իմ քայլը» խմբակցության պատգամավոր, օրինագծի համահեղինակ Արթուր Հովհաննիսյանը:
Հիշեցնենք՝ ՀՀ ԱԺ «Իմ քայլը» խմբակցության 5 պատգամավորների առաջարկը` փոփոխություններ կատարել «Զանգվածային լրատվության մասին» օրենքում, որով կարգելվի անանուն և չնույնականացվող տեղեկատվական աղբյուրներին հղում անելը, աղմուկ է բարձրացրել մասնագիտական շրջանակներում։
«Անհայտ ծագումնաբանությամբ աղբյուրների տարածումը՝ դրանց հղում կատարելու միջոցով, կարող է առաջացնել ազգային անվտանգությանը սպառնացող ռիսկեր»,- ասվում է նախագծի հիմնավորման մեջ։
Ըստ նախագծի՝ «անանուն աղբյուրի» սահմանումը հետևյալն է․ «համացանցում գրանցված դոմեյն, հոսթինգ ունեցող կայք կամ համացանցային կայքի կամ հավելվածի օգտահաշիվ կամ ալիք, որի տնօրինողի նույնականացման տվյալները թաքցված են ընթերցողից»։
Կարդացեք նաև
Արթուր Հովհաննիսյանը վստահեցրեց՝ որևէ տառ չի փոխվել ԶԼՄ օրենքի՝ տեղեկատվության աղբյուրի պաշտպանության հոդվածում:
Նա նշեց, թե այսօր մի շարք սոցիալական հարթակներ, հավելվածներ, տելեգրամյան ալիքներ, ֆեյսբուքյան էջեր գովազդվում են իրական լրատվական միջոցների կողմից՝ ակտիվ հղում դնելով՝ անկախ՝ այդ տեղեկությունը ճիշտ է թե՞ սխալ: Մինչդեռ ըստ պատգամավորի՝ մենք չգիտենք՝ այդ ալիքները որտեղ են բացված, ինչ նպատակով, ում կողմից: Այնուհետև շարունակեց. «Փաստացի այդ աղբյուրները դառնում են ավելի հայտնի, լեգիտիմ տեղեկատվության սպառման համար, քան բուն լրատվամիջոցները: Մեր նպատակն է տարանջատել իրական և բարեխիղճ լրագրողներին այնպիսի հարթակներից, որոնք տեղեկատվական աղբյուրներ կոչվել էլ չեն կարող, քանի որ չեն համապատասխանում զանգվածային լրատվության մասին օրենքին»:
Պատգամավորը նաև այս տեսանկյունից ռիսկեր է տեսնում ազգային անվտանգության առումով: Նրա կարծիքով՝ քննադատությունները գուցե առաջացել են «անանուն աղբյուր» ձևակերպման պատճառով, և գուցե այն փոխեն:
Հարցին՝ այս օրենքով լուծում են բովանդակությա՞ն հարց, թե՞ խնդիրն այն է, որ այդ անանուն աղբյուրները՝ հարթակները չգովազդվեն, դրանց հղում չկատարեն, նա պատասխանեց. «Բովանդակությունն առանձին խնդիր է, որին պետք է գնալ առանձին օրենսդրական կարգավորումներով: Մենք խոսում ենք աղբյուրների մասին, որոնց չի կարելի գովազդել, քանի որ չգիտենք՝ ինչ ենք գովազդում»:
Արձագանքելով քննադատություններին, թե լռեցնում են տեղեկատվության այս կամ այն աղբյուրին՝ Արթուր Հովհաննիսյանն ասաց. «Ինչ գրել են, էլի կգրեն, ինչ գրում են էլի, կգրեք, այստեղ սահմանափակումը ո՞րն է: Մենք ասում ենք՝ մարդկանց աչքը մի մտցրեք աղբյուրներ, որոնք չգիտենք՝ ով է բացել, ինչ նպատակով: Մենք սրա մասին ենք խոսում: Մենք որևէ կերպ չենք սահմանափակում տեղեկատվության տարածման իրավունքը: Վերցրեք, տեղեկությունները տարածեք»:
Տաթև ՀԱՐՈՒԹՅՈՒՆՅԱՆ
