Ազգային ժողովի փետրվարի 3-ին գումարված արտահերթ նիստում քննարկվեց «ՀՀ դատական օրենսգիրք» սահմանադրական օրենքում եւ «Արդարադատության ակադեմիայի մասին» օրենքում փոփոխություններ եւ լրացումներ նախատեսող օրենսդրական փաթեթը:
ՀՀ արդարադատության նախարար Ռուստամ Բադասյանի խոսքով՝ նպատակն է թեթեւացնել դատարանների ծանրաբեռնվածությունը, ապահովել մինչդատական քրեական վարույթի գործերի, ինչպես նաեւ կոռուպցիոն հանցագործությունների հետ կապված գործերի քննության արդյունավետությունը, ռեսուրսների առավել արդյունավետ օգտագործումը, կոռուպցիոն ռիսկերի նվազեցումը: Նախատեսվում է դատավորների թիվն ավելացնել Առաջին ատյանում, Ընդհանուր իրավասության եւ Վերաքննիչ քրեական դատարաններում: Մինչդատական քրեական վարույթի գործերի եւ կոռուպցիոն հանցագործությունների քննության իրականացումը նախատեսվում է վերապահել ինչպես գործող դատավորներին, այնպես էլ նոր համալրված կադրերին:
Փոփոխությունների արդյունքում դատական համակարգում ընդհանուր առմամբ 17-ով կավելանա դատավորների թիվը, որոնցից առնվազն 8-ը՝ Երեւանում: Վերաքննիչ դատարանի դատավորների թիվը կավելանա 3-ով: Վերաքննիչ դատարանի 6 դատավոր կմասնագիտանան մինչդատական վարույթի նկատմամբ դատական վերահսկողության գործերով:
Կարդացեք նաև
ՀՀ ԱԺ պետական-իրավական հարցերի մշտական հանձնաժողովի անդամ Սուրեն Գրիգորյանը ներկայացրեց հանձնաժողովի դրական եզրակացությունը: Դատավորներին ընտրելու է ԲԴԽ-ն, նախագծում բառ անգամ չկա, թե նշանակվելու են դատավորներ, որոնք զբաղվելու են հակակոռուպցիոն գործեր քննելով: Գրիգորյանի համոզմամբ` խորհրդարանի աշխատանքի որակը շատ դեպքերում ընկնում է այն պատճառով, որ պատգամավորներից ոմանք պարզապես չեն կարդում օրենքների նախագծերը:
Մտքերի փոխանակության ընթացքում պատգամավորներն անդրադարձան ներքաղաքական իրավիճակին, դատական համակարգում արմատական բարեփոխումների անհրաժեշտությանը, անարդյունավետ գնահատեցին իրականացվող հատվածական փոփոխությունները:
ԱԺ «Լուսավոր Հայաստան» խմբակցության տեսակետը հայտնեց Անի Սամսոնյանը: Նա նշեց, որ նախաձեռնության հեղինակները թեպետ պնդում են, որ նախագծից հանված է մի շարք գործերով, այդ թվում՝ հակակոռուպցիոն գործերով զբաղվող դատավորներին վերաբերող դրույթը, բայց լրամշակված տարբերակում այն առկա է: Սուրեն Գրիգորյանն ի պատասխան ասաց, որ ԱԺ կայքում տեղադրված վերջնական տեքստում նման դրույթ չկա:
ԱԺ «Իմ քայլը» խմբակցության անունից ելույթ ունեցավ Ալեն Սիմոնյանը: «30 տարի իշխանության եղած մարդիկ մեզ մեղադրում են երկու տարվա մեջ չարածների համար: Այո՛, չարեցինք: Որոշ մարդկանց բենթլիները, դղյակները չհասցրինք երկու տարվա մեջ դարձնել ԱԹՍ: Այո՛, մեղավոր ենք, կուղղենք, դա էլ կուղղենք, կհասցնենք, վստահ եմ»:
Եզրափակիչ խոսքում Ռուստամ Բադասյանը նշեց, որ նախագիծը հապճեպ չի ընդունվում, դեկտեմբերից դրված է հանրային քննարկման:
Պատգամավորները քննարկված երկու օրենսդրական փաթեթներն ընդունեցին առաջին ընթերցմամբ:
Փաթեթների երկրորդ ընթերցմամբ քննարկումները կանցկացվեն առաջին ընթերցմամբ ընդունելուց հետո 24 ժամվա ընթացքում, իսկ մինչ այդ դրանք կքննարկվեն գլխադասային հանձնաժողովներում:
ՀՀ Ազգային ժողով
