Այսօր Երեւանի ընդհանուր իրավասության դատարանի Շենգավիթի նստավայրում, դատավոր Մեսրոպ Մակյանի գլխավորությամբ տեղի ունեցավ «Սասնա ծռեր» խմբի տասն անդամների գործով դատական նիստը:
«Փաշինյանը պետք է գա այստեղ ու առայժմ վկայի կարգավիճակում հարցաքննվի, հետագայում չի բացառվում որպես մեղադրյալ ներգրավվի այս քրեական գործի շրջանակներում»,-դատարանում ասաց «Սասնա ծռերի» գործով ամբաստանյալ Պավել Մանուկյանի պաշտպան Զարուհի Փոստանջյանը։ Նա, դատաքննությունը վերսկսելու վերաբերյալ միջնորդություն ներկայացրեց դատարանին՝ Նիկոլ Փաշինյանին որպես վկա հարցաքննելու: Ասաց, որ միջնորդությունն առայժմ վկայի կարգավիճակում է. «Ինչպե՞ս է նա այդ օրը, այդ ժամին հայտնվել ՊՊԾ գնդում, որովհետեւ, այդ օրը ոչ մեկին թույլ չեն տվել մտնել ՊՊԾ գունդ: Ո՞վ է թույլ տվել Նիկոլ Փաշինյանին այցելել, ինչո՞ւ նա այցելեց այդ ոստիկանին: Ապստամբությունից հետո մեր իրավապահ մարմինները գունդը շրջափակած են եղել: Անձը, որը ցեղասպանությամբ հանձնեց Արցախը ինչպե՞ս կարողացավ այդ օրը մուտք գործել ՊՊԾ գունդ»:
Զարուհի Փոստանջյանը հայտնեց, որ Փաշինյանը հանդիսանում է սույն քրեական գործով ապստամբության պատճառների եւ ոստիկան Գագիկ Մկրտչյանի հրազենային վնասվածք ստանալու վերաբերյալ տեղեկատվություն կրող անձ. «2016 թվականի հուլիսի 17-ին Նիկոլ Փաշինյանն անհայտ պայմաններում կարողացել է մուտք գործել ՊՊԾ գունդ, տեղեկություն հավաքել ՊՊԾ գնդում տեղի ունեցած իրադարձությունների վերաբերյալ։ Այդ օրերին նա կապի մեջ է եղել Հայաստանի իրավապահ մարմինների հետ եւ իրազեկված է՝ ով է պատճառել Գագիկ Մկրտչյանին հրազենային վնասվածք»։
Ապա դատարանի դահլիճում հրապարակվեց Նիկոլ Փաշինյանի՝ ՊՊԾ գնդի գրավման օրերի ելույթից մի հատված:
Կարդացեք նաև
Գագիկ Մկրտչյանի կինը հարցրեց, թե որտեղի՞ց են վերցրել, որ Նիկոլ Փաշինյանն այցելել է իր ամուսնուն: Ասաց, որ ինքն ամեն օր առավոտյան ժամը 8-ից մինչեւ կեսգիշերն անց հիվանդանոցում է եղել եւ Փաշինյանին երբեւէ չի տեսել։
Մեղադրող դատախազ Արամյանն առարկեց Նիկոլ Փաշինյանին որպես վկա հարցաքննության կանչելու Զարուհի Փոստանջյանի միջնորդությունը: Ասաց, որ Փոստանջյանի կողմից բերված հիմնավորումները որեւէ կերպ չեն կարող ազդեցություն ունենալ ամբաստանյալներին մեղսագրված հանցավոր արարքների հիմնավորման կամ հերքման համար։ Ըստ դատախազի, միջնորդությունն անհիմն է ու ենթակա է մերժման։
Դատավոր Մեսրոպ Մակյանը նույնպես Փոստանջյանի ներկայացրած միջնորդությունը մերժեց՝ նշելով, որ դատողությունները ենթադրական բնույթի են եւ այս գործի քննության ընթացքում որեւէ փոխկապակցված ապացույցի հետ աղերս չունեն: Դատավորի խոսքով, դատաքննության ընթացքում նման տվյալներ ձեռք չեն բերվել։
Լուսինե ԲՈՒԴԱՂՅԱՆ
