Այսօր ԱԺ արտահերթ նիստում կառավարությունը քննարկման է ներկայացրել «Դատական օրենսգիրք» սահմանադրական օրենսգրքում փոփոխությունների, ինչպես նաեւ «Սոցիալական աջակցության մասին» օրենսդրական նախաձեռնությունների փաթեթները:
«Լուսավոր Հայաստան» խմբակցության պատգամավոր Տարոն Սիմոնյանի համար անհասկանալի էր՝ այս նախագծերի հրատապ ընդունման անհրաժեշտությունն ինչո՞վ է պայմանավորված. «Եթե դուք բերեիք նախագիծ «Արցախի օկուպացված տարածքների դեօկուպացիայի մասին», ես կհասկանայի: Բերեիք նախագիծ «Զենքի մասին» օրենքում փոփոխությունների՝ էլի կհասկանայի: Բերեիք բանակաշինության բնագավառում արմատական փոփոխությունների նախագիծ, որովհետեւ մեր առաջնահերթ խնդիրը անվտանգային խնդիրներն են: Ես դատական բարեփոխումների կողմնակից եմ, բայց առաջնահերթ կարգով այս հարցի քննարկումը չեմ հասկանում ու հատկապես այս բովանդակության, մի հատ հիմնավորեք, խնդրում եմ»:
RA National Assembly building took place
Արդարադատության նախարար Ռուստամ Բադասյանը, որը զեկուցող էր, պատասխանեց, որ դատական ծանրաբեռնվածության հարցը մեկուկես տարի է՝ քննարկում են, պատգամավորներն անընդհատ բողոքում են, որ գործերի քննությունը երկար է տեւում. «Հիմա մենք այդ հարցը մոտ ենք լուծելուn, դրա համար էլ հրատապ է: Դատական ծանրաբեռնվածության հարցը առաջնահերթ է»:
Տարոն Սիմոնյանն արձագանքեց. «Եթե այս տեքստն ասեիք մեկ-երկու տարի առաջ, ես կհամաձայնեի: Հիմա արմատական փոփոխություններ ենք տեղի ունեցել թե՛ տարածաշրջանում, թե՛ Հայաստանում, թե՛ պետականաշինության գործում: Մենք էլ պիտի վերանայենք, չէ՞ մեր առաջնահերթությունները»:
Կարդացեք նաև
Տարոն Սիմոնյանը հիշեց, թե որ նախագծերը պետք է բերեին. «Հիմա սահմանամերձ համայնքների հետ կապված խնդիր ունենք, զենքի կրման անհրաժեշտության հետ կապված խնդիր ունենք, բանակ կառուցելու նոր խնդիր ունենք մեր առջեւ դրված ու այդ ամեն ինչը օրենքի մակարդակով պետք է անեինք»:
RA National Assembly building took place
«Լուսավոր Հայաստանից» Անի Սամսոնյանն էլ դժգոհեց, որ դատական բարեփոխումների կարկատաններ են անում ու հարցրեց՝ երկա՞ր եք նման կարկատաններ անելու: Բադասյանը չհամաձայնեց գնահատականին ու ասաց. «Մեծ խնդիր ունենք հանրային վստահությունը բարձրացնենք դատական համակարգի նկատմամբ: Սա անակնկալ չի, բացահայտում չի: Եթե դուք այլ մոդել ունեք կոնցեպտուալ, ես առաջարկում եմ օրենսդրական նախաձեռնությամբ հանդես գաք, որ կարկատաններով չլինի: Հանրությունը, կարծում եմ, կաջակցի ձեզ»:
Հռիփսիմե ՋԵԲԵՋՅԱՆ
