Երեւանի օլիմպիական հերթափոխի պետական մարզական քոլեջում ընթանում է ծանրամարտի Հայաստանի տղամարդկանց առաջնությունը: Aravot.am-ը զրուցել է Հայաստանի ծանրամարտի ֆեդերացիայի գլխավոր քարտուղար, տղամարդկանց հավաքականի գլխավոր մարզիչ Փաշիկ Ալավերդյանի հետ:
-Կորոնավիրուսի համավարակը ամբողջ աշխարհում խառնել է բոլոր ոլորտների ծրագրերը: COVID 19-ը ինչպե՞ս է անդրադարձել հայկական ծանրամարտի վրա:
-Կորոնավիրուսն ինձ ոչնչով չի հետաքրքրել: Չեմ ասում, թե կառավարության որոշումները չենք կատարել: Բայց ամեն բան արել ենք մեկուսացված վիճակում՝ բժշկի ներկայությամբ ու հսկողությամբ: Այս ամբողջ ընթացքում գրեթե ամեն ամիս ունեցել ենք ուսումնամարզական հավաք: Դրա համար ծանրորդներն այսօր գտնվում են մարզական լավ վիճակում: Այս առաջնությունում ծանրորդների բարձրացած կիլոգրամները կտեսնեք, կհամեմատեք նախորդ տարիների հետ եւ կհամոզվեք, որ հետ չենք ընկել:
-Ինչպե՞ս է այդ ամենը հաջողվել:
Կարդացեք նաև
-Իմ վրա դա շատ թանկ է նստել: Ոչ վիտամիններ, ոչ վերականգնիչներ ու այլ անհրաժեշտ բաներ չեմ ստացել: Թոշակս եմ տրամադրել ու գնել: Հիմա էլ վերջին երկու ամսվա միջոցներս եմ կուտակում, որպեսզի դրանք ձեռք բերեմ դրսից:
-Ձեզ ճանաչողները գիտեն, որ միշտ եք այդպիսին եղել: Ինչի՞ համար:
-Բնավորությունս է այդպիսին: Պարտվել չեմ կարող, ամաչում եմ: Ես չեմ պարտվում, հետո ամաչում, այլ ամաչում եմ, որ կպարտվեմ: Փառք Աստծո, ամեն բան բարեհաջող է: Նախարարությունը անցած տարի ընդառաջեց, թույլատրեց հուլիս, օգոստոս ամիսներին կազմակերպել պատանիների եւ երիտասարդների առաջնությունները, իսկ մեծահասակներինը անցկացրել էինք մինչեւ կորոնավիրուսի ի հայտ գալը:
-Օլիմպիական խաղերի հետաձգումը մեկ տարով անշուշտ անդրադարձավ հավաքականի պլանների եւ աշխատանքների վրա:
-Բնականաբար: Շատ դժվար է պահանջվող ժամանակահատվածում ծանրորդներին երեք անգամ հասցնել մարզավիճակի գագաթին ու երեք անգամ դուրս հանել:
-Արգելված խթանիչների մասի՞ն ինչ կասեք:
-Դրա մասին ընդհանրապես մոռացել ենք: Դուք էլ մոռացեք: Այդպիսի բան արդեն երկար տարիներ, պարզապես, չկա: Ու քանի ես ողջ եմ, չի լինելու:
-Պարոն Ալավերդյան: Դուք համակարգում եք նաեւ կանանց հավաքականները: Նրանց մասին ի՞նչ կասեք:
-Նրանց համար մարզական կյանքը մի փոքր ավելի սուղ ստացվեց: Բայց յոթ ամիս նրանք էլ Արտաշես Ներսիսյանի ղեկավարությամբ մասնակցել են ուսումնամարզական հավաքների: Աղջիկների մարզավիճակն էլ հիմա վատ չէ: Օրերս իրենց առաջնությունում գոհացուցիչ արդյունքներ են գրանցել:
-Ծանրորդների մասնակցության քանակը ՀՀ առաջնությանը գոհացնո՞ւմ է:
– Ընդհանուր առմամբ մասնակցում է մոտ 125 մարզիկ-մարզուհի: Սա մեծահասակների առաջնություն է: Պատանիներին աշխատում ենք իրենց մրցումներին նախապատրաստել:
-Առաջնության ավարտից հետո հավաքականի ի՞նչ ծրագրեր ունեք:
-Տղամարդկանց հավաքականը, որը ես եմ գլխավորում, 90 տոկոսով պատրաստ է: Ես արել եմ այնպես, որ արդեն հինգ տարուց ավելի մեր հավաքականը մշտապես ձեւավորված է: Խիստ ձեւակերպեմ. եթե հավաքականի անդամը պարտվի մեկ այլ ծանրորդի, հրաժեշտ կտա թիմին:
Առաջնությունից հետո մեր ծրագիրը օլիմպիական խաղերին նախապատրաստվելն է: Շարունակելու ենք ուսումնամարզական հավաքները: Մեծահասակների համար մինչեւ օլիմպիական խաղերը Եվրոպայի առաջնությունն է ապրիլի 3-10-ը: Բոլորն էլ կմասնակցեն: Բայց օլիմպիական խաղերում մեզ տրված մեկ քվոտայով պլանավորում ենք, որ տղամարդկանց պայքարին կմասնակցի Սիմոն Մարտիրոսյանը, իսկ աղջիկներից միակ տեղին հավակնում են Իզաբելլա Յայլյանն ու Տաթեւ Հակոբյանը: Ով ավելի լավ մարզավիճակում եղավ, նա էլ կմասնակցի:
Բայց ուզում եմ տեղեկացնել նաեւ, որ մեծերի թիմի մեջ կան երիտասարդներ: Չզարմանաք, նույնիսկ պատանիներ կարող են լինել, որովհետեւ ես մեր համար սերնդափոխություն ասվածի ավանդական ընկալումը փոխել եմ: Մարզիչը չպետք է սպասի սերնդափոխության, այլ պետք է այնպես աշխատի, որ մի մարզիկը երբ գնա, նրան անմիջապես փոխարինի մեկ ուրիշը, ավելի լավը:
Աշոտ ՀԱԿՈԲՅԱՆ
