«Այսինքն՝ Երևանում կա ինչ-որ մեկը, որ իր քաղաքապետին չի ճանաչում ուղղակի»,-«Հայելի» ակումբում հրավիրված մամուլի ասուլիսի ընթացքում հայտարարեց Երևանի ավագանու ԲՀԿ խմբակցության քարտուղար Հռիփսիմե Առաքելյանը՝ անդրադառնալով Երևանի քաղաքապետ Հայկ Մարությանի հետ կատարված միջադեպին և նրա խոսնակի պարզաբանմանը:
Երևանի քաղաքապետ Հայկ Մարությանի խոսնակ Հակոբ Կարապետյանը, մասնավորապես, պարզաբանել է. «Երևանի քաղաքապետ Հայկ Մարությանը անցած շաբաթ եւ կիրակի օրերին որդու հետ մաքրելիս է եղել իր տան հարակից տարածքները ձյան ծածկույթից: Կիրակի ցերեկը ակնհայտ անսթափ վիճակում գտնվող մի անցորդ հասարակական կարգը խախտող վարք է դրսեւորել, ինչին արձագանքելով՝ քաղաքապետը դիտողություն է արել և պահանջել է քաղաքացուց հանրային տարածքում պահպանել բարեվարքության կանոնները: Ավելի ուշ անսթափ քաղաքացու հարազատները հանդիպել են քաղաքապետ Մարությանի հետ, նշել, որ իրենց որդին անսթափ լինելով, չի ճանաչել քաղաքապետին, անպատշաճ վարք է դրսևորել, եւ ներողություն են խնդրել միջադեպի համար: Հայկ Մարությանը միջադեպը համարում է սպառված»:
Այս առիթով Հռիփսիմե Առաքելյանը, դիմելով Հայկ Մարությանին, ասաց. «Մարությա′ն, մենք բահերով դուրս չպետք է գանք «один на один» մայթերի սառույցները ջարդելու: Մենք հսկայական գումար ենք տվել դրա համար, հսկայական ՀՈԱԿ ենք ստեղծել. ինքս կողմ եմ քվեարկել, որ կարողանանք մաքրման աշխատանքներ իրականացնել Երևանում: Ի՞նչ է սա նշանակում: Ամեն մեկն իր փոցխն ու բահը վերցնի, գան Երևանի փողոցները մաքրե՞ն»:
Հռիփսիմե Առաքելյանը, հղում կատարելով սոցիոլոգիական հարցումներին, հավաստիացրեց՝ Հայկ Մարությանի վարկանիշն անկում է ապրում ու նշեց. «Տեսնելով, որ իր թիմն էլ իրեն չի պահում, որոշել է ձնամաքրմամբ զբաղվել»:
Կարդացեք նաև
Տաթև ՀԱՐՈՒԹՅՈՒՆՅԱՆ
