«Իմ քայլի» շատ պատգամավորներ ամբիցիաներով, մուննաթով են խոսում, հանդես գալիս։ Լավ կլիներ՝ սիրեին ժողովրդին եւ այն մարդկանց կողին լինեին ամբողջությամբ, որոնք այսօր ծանր վիճակում են, վշտի մեջ են»,-Civilnet TV-ի կազմակերպած առցանց քննարկման ժամանակ այսօր ասաց իրավապաշտպան Ժաննա Ալեքսանյանը։ «Այդ նվիրվածությունից կշահեր իշխանությունը։ Դա այն անկեղծ, բաց ճանապարհն է, որը մարդիկ կգնահատեին»,-համոզմունք հայտնեց տիկին Ալեքսանյանը։
Նա կարծում է, որ երբ Նիկոլ Փաշինյանն ասում է, թե պատասխանատվություն է կրում, սակայն թիվ մեկ մեղավորն ինքը չէ, պետք է պարզաբանի, թե ինչու թիվ մեկ մեղավորը չէ․ «Որոշ ընդհանուր բաներ պետք է անկեղծորեն մարդկանց ասեր, թե ինչ էր տեղի ունեցել։ Չեմ ասում՝ բոլոր մանրամասները հրապարակեր, բայց դա կբերեր վստահությանը, մթնոլորտի հանդարտեցմանը։ Մինչեւ հիմա տպավորություն է, որ կաշկանդվածություն կա նման հայտարարություններ անելու, մինչդեռ դրանք կթուլացնեին լարվածությունը»։
Ժաննա Ալեքսանյանի խոսքով՝ մինչեւ հիմա մարդիկ չգիտեն, թե ինչու չհաղթեցինք․ «Այն թերությունները, որոնք եղան, մի քանի բառով պետք է բացատրեին։ Վճռական խոսքի կարիք ունի ժողովուրդը, որ մեղավորները պատժվելու են։ Թափանցիկություն է պետք։ Իշխանությունը փոփոխությունների շատ մեծ եւ վճռական պահանջ պետք է դներ, սակայն ես չեմ տեսել նման վճռականություն»։
Կարդացեք նաև
Լուիզա ՍՈՒՔԻԱՍՅԱՆ
