«Այն, ինչ կատարվում էր օդանավակայանում այսօր, արմագեդոն էր: Պետք էր տեսնել, թե մեր հայրենակիցները ընտանիքներով, նորածին երեխաներով ինչպես էին փախչում հայրենիքից»,- այսօր «Հայելի» մամուլի ակումբում ասաց ԲՀԿ խմբակցության պատգամավոր Նաիրա Զոհրաբյանը`անդրադառնալով այսօր «Զվարթնոց» օդանավակայանում ստեղծված խառնաշփոթին:
Հիշեցնենք, որ ՀՀ քաղաքացիների մուտքը դեպի ՌԴ բացվել է այսօրվանից`փետրվարի 1-ից՝ մեկ ամսով։ Հայաստանից դեպի Մոսկվա 4 չվերթ կիրականացվի:
«Քանի որ մեր հայրենակիցներից շատերը տեղյակ չէին, որ COVID-ի թեստը պետք է ներբեռնեին հեռախոսի մեջ եւ թղթային տարբերակով էին գնացել թռիչքի, իրենց թույլ չէին տալիս թռչել: Իսկ երեկ 23.30-ին Երեւան-Մոսկվա մեկ կողմանի տոմսի գինը հասավ 750 դոլարի: Առաջիկա օրերին երեւի տոմսերը վաճառելու են աճուրդով, լոտերով»,- հեգնեց Նաիրա Զոհրաբյանը` հավելելով. «Այն հաջողակները, որոնք ներբեռնել էին COVID-ի ծրագիրը եւ բոլոր կանոնները պահպանել էին, նրանց հաջողվեց թռնել, նրանք իրենց համարեցին երջանիկ: Ես կարող եմ ցավալի կանխատեսում անել, որ այս արտագաղթը 90-ականների արտագաղթից ավելի զարհուրելի արտագաղթ է լինելու: Ինչո՞ւ: Որովհետեւ, ցավոք սրտի, մեր բազմաթիվ հայրենակիցների եւ նրանց երեխաների համար Հայաստանը ամենավտանգավոր երկիրն է»:
Նաիրա Զոհրաբյանը հետաքրքրվել է, թե ինչո՞ւ են մարդիկ գնում. «Եվ պատճառը հուսալքությունն էր, տագնապը եւ անվստահությունը, որ վաղը Երեւանում, Վանաձորում եւ մեր այլ քաղաքներում թուրքը դուռը բացելու ու մտնելու իրենց տուն»:
Կարդացեք նաև
Նաիրա Զոհրաբյանի պնդմամբ` հեռացողները մեծ մասամբ Նիկոլ Փաշինյանին ընտրողներն էին. «Այո, նրանք էին, որովհետեւ պարզ էր, այն հատվածն էր, ով երկար տարիների հուսալքությունից, անարդարություններից, հուսահատությունից, Նիկոլի եւ նիկոլականության մեջ, իշխանափոխության, այդ հեղափոխության մեջ տեսել էր հույս եւ հավատում էր, որ, իրոք, ինքը 3 միլիոն վարչապետներից մեկն է, որ ինքն այլեւս լավ է ապրելու, որովհետեւ Նիկոլը բոլորի թալանածը հետ է բերելու եւ ծրարներով բաժանելու է 3 միլիոն վարչապետերին»:
Նելլի ԳՐԻԳՈՐՅԱՆ
