Քիչ առաջ Երևան քաղաքի ընդհանուր իրավասության դատարանում ավարտվեց ՀՀ սպորտի վաստակավոր վարպետ, բռնցքամարտիկ Իսրայել Հակոբկոխյանի գործով դատական նիստը:
Նրա ձերբակալության իրավաչափության հետ կապված՝ պաշտպանի ներկայացրած բողոքի հարցով դատարանը որոշումը կհրապարակի վաղը՝ ժամը 16.00-ին:
Aravot.am-ի հետ զրույցում Իսրայել Հակոբկոխյանի պաշտպան Գոռ Սաղոյանը տեղեկացրեց՝ երեկ բողոքարկել էին Իսրայել Հակոբկոխյանի ձերբակալության իրավաչափության հարցը ու մանրամասնեց. «Երեկ նիստը սկսվեց, ընթացքում մուտքագրվեց նաև կալանավորման միջնորդությունը: Ու արդեն օրենքով սահմանված կարգով միացվեց. քննարկվում է համատեղ: Այսօր՝ ժամը 20.00-ից նիստը սկսվել էր: Քիչ առաջ այն ավարտվեց: Վաղը՝ ժամը 16:00-ին դատարանը կհրապարակի որոշումը»:
Հիշեցնենք՝ հունվարի 28-ին ՀՀ վարչապետ Նիկոլ Փաշինյանի հրաժարականի պահանջով հայահավաքի ընթացքում 21 անձ բերման է ենթարկվել ՀՀ քրեական օրենսգրքի 219-րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել էր՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։ Վարույթ իրականացնող մարմինը նրանց մեղադրանք է առաջադրել՝ ՀՀ քրեական օրենսգրքի 34-219-րդ հոդվածի 2-րդ մասի 1-ին կետի՝ մի խումբ անձանց կողմից նախնական համաձայնությամբ շենք-շինություններ զավթելու փորձի հատկանիշներով։
Կարդացեք նաև
Տաթև ՀԱՐՈՒԹՅՈՒՆՅԱՆ
